ەرتەڭنەن الماتىدا ازىق-تۇلىك ساتاتىن ورىندار مەن ءدارىحانالاردان باسقا بارلىق نىساندار جابىلادى. بۇل تۋرالى ونلاين بريفينگ وتكىزگەن الماتى قالاسى اكىمىنىڭ ورىنباسارى ساپاربەك تۇياقبايەۆ ايتتى.
ونىڭ سوزىنشە، بۇل شەشىم توتەنشە جاعداي جونىندەگى مەملەكەتتىك كوممياسيامەن بىرلەسە وتىرىپ قابىلدانعان.
"بۇگىننەن باستاپ ءبىز قىزمەت كورسەتۋ جانە ساۋدا سالاسىنداعى كەيبىر كاسىپكەرلىك نىساندارىنىڭ جۇمىسىنا قويىلعان شەكتەۋدى كەڭەيتۋ تۋرالى شەشىم شىعاردىق. مۇنىڭ الدىندا ءىرى ساۋدا ورىندارى، ساۋدا ويىن ساۋىق ورتالىقتارى، سۇلۋلىق سالوندارى، قوعامدىق تاماقتانۋ ورىندارى جابىق بولاتىن. ال ەرتەڭنەن باستاپ جاڭا رەجىم كۇشىنە ەنەدى. ياعني، ازىق تۇلىك دۇكەندەرى مەن ءدارىحانادان باسقا بارلىق نىساندار جابىلادى" تۇياقبايەۆ.
اكىم ورىنباسارانىڭ ايتۋىنشا، قالادا ءدامحانا مەن قوعامدىق تاماقتانۋ ورىندارىنان تاماقتى ۇيگە الىپ كەتۋگە بولادى. ال ازىق-تۇلىك ەمەس ساۋدا ورىندارىنىڭ ۇلكەن-كىشىلىگىنە قاراماستان تۇگەل جابىلادى. تۇياقبايەۆتىڭ ايتۋىنشا، جابىلاتىن نىسانداردىڭ قاتارىندا اۆتوسالوندار، اۆتوبولشەك ساتىن ورىندار، گۇل ساتاتىن پاۆيلوندار، حيميالىق تازالاۋ ورتالىقتارى، فوتوسالوندار، وپتيكا سالوندارى، لومبارد، جىلجىمايتىن مۇلىك بويىنشا اگەنتتىكتەر، تقكو-لار بار.
پىكىر قالدىرۋ