25 ناۋرىزدا ۇلتتىق قاۋىپسىزدىك كوميتەتى نۇر-سۇلتان قالاسىندا جەدەل-ىزدەستىرۋ ءىس-شارالارىنىڭ ناتيجەسىندە دەسترۋكتيۆتى ءدىني اعىم ۇستانۋشىسىن ۇستادى. بۇل تۋرالى ۇقك-نىڭ باسپا ءسوز قىزمەتى حابارلادى.
كوميتەت مالىمەتىنشە، ول "دايش" حالىقارالىق تەرروريست ۇيىمى (قازاقستاندا تىيىم سالىنعان) يدەولوگياسىنىڭ ىقپالىمەن استانا اۋماعىندا تەراكت دايىندادى دەگەن كۇدىككە ءىلىندى. تەرگەۋ ءىس-قيمىلدارى بارىسىندا ودان جويۋ ەلەمەنتتەرى بار قولدان جاسالعان جارىلعىش قۇرىلعى الىندى.
"كورسەتىلگەن ادامعا قاتىستى قازاقستان رەسپۋبليكاسى قىلمىستىق كودەكسىنىڭ 24 جانە 255 (تەرروريزم اكتىسىنە دايىندالۋ) باپتارى بويىنشا سوتقا دەيىنگى تەرگەپ-تەكسەرۋ باستالدى. تەرگەۋ جالعاسىپ جاتىر" دەلىنگەن حابارلامادا.
پىكىر قالدىرۋ