قازاقستان پرەزيدەنتى قاسىم-جومارت توقايەۆ بۇگىن كوروناۆيرۋستان قايتىس بولعان ايەل ادامنىڭ تۋىستارىنا كوڭىل ايتتى.

"64 جاستاعى ايەلدىڭ كوروناۆيرۋستان قايتىس بولۋى – بۇل ىندەتتىڭ اسا ءقاۋىپتى ءارى كارانتين ءتارتىبىن ساقتاۋ وتە ماڭىزدى ەكەنىن كورسەتتى. تۋعان-تۋىستارىنا كوڭىل ايتامىن. ەلوردا مەن الماتىدا كارانتين شارالارىن كۇشەيتىپ، شىمكەنتتە شەكتەۋلەر ەنگىزۋ جونىندە شەشىم قابىلداندى. وسىنداي قاجەتتى شارا قولدانۋعا ءماجبۇرمىز. ەپيدەميانى ءبارىمىز بىرگە جەڭەمىز. ودان ساباق الىپ، ءتيىستى قورىتىندى جاسايمىز" دەپ جازدى پرەزيدەنت.

بۇگىن، 26 ناۋرىزدا قازاقستاندا كوروناۆيرۋس جۇقتىرعان ءبىر ادامنىڭ قايتىس بولعانى بەلگىلى بولدى. بۇل – ەلدە وسى ىندەتتەن قازا تاپقان العاشقى ادام. 

سوڭعى دەرەك بويىنشا، ەلدە 13 ناۋرىزدان بەرى 111 ادام كوروناۆيرۋس ينفەكسياسىن جۇقتىردى. ولاردىڭ ەكەۋى دەرتىنەن ايىقتى. ىندەت جۇقتىرعانداردىڭ باسىم بولىگى الماتى مەن نۇر-سۇلتاندا. 

كوروناۆيرۋسقا بايلانىستى قازاقستاننىڭ بارلىق اۋماعىندا 16 ناۋرىزدان 15 ساۋىرگە دەيىن توتەنشە جاعداي. ال الماتى مەن نۇر-سۇلتان 19 ناۋرىزدان باستاپ كارانتينگە جابىلعان. بۇل قالالارعا كىرىپ-شىعۋعا تىيىم سالىنعان. بۇگىننەن باستاپ قالا ىشىندە ازىق-تۇلىك دۇكەندەرى مەن ءدارىحانالار عانا جۇمىس ىستەپ تۇر.