جامبىل وبلىسىندا كوروناۆيرۋس جۇقتىرعان تاعى ءبىر ادام انىقتالدى. وسىلايشا بۇل ايماقتا ىندەت تابىلعان ادامدار سانى 3-كە جەتتى. بۇعان دەيىن وسى وبلىستىڭ ءبىر تۇرعىنىنان 24 نارىز كۇنى، ءبىر تۇرعىنىنان بۇگىن ۆيرۋس تابىلعان بولاتىن. ول ەكەۋى دە – قىرعىزستاننان كەلگەن ازاماتتار.
قازاقستاندا ءقازىر ۆيرۋس جۇقتىرعان ادامدار 113-كە جەتىپ وتىر. ىندەت تابىلعان ناۋقاستاردىڭ باسىم بولىگى الماتى مەن نۇر-سۇلتاندا تىركەلگەن.
بۇگىن، 26 ناۋرىز كۇنى نۇر-سۇلتاندا ءبىر ايەل ادام كوروناۆيرۋستان قايتىس بولدى. ال 25 ناۋرىزدا الماتىدا ءبىر، نۇر-سۇلتاندا ءبىر ناۋقاس ىندەتتەن ايىققان بولاتىن.
كوروناۆيرۋسقا بايلانىستى قازاقستاننىڭ بارلىق اۋماعىندا 16 ناۋرىزدان 15 ساۋىرگە دەيىن توتەنشە جاعداي. ال الماتى مەن نۇر-سۇلتان 19 ناۋرىزدان باستاپ كارانتينگە جابىلعان. بۇل قالالارعا كىرىپ-شىعۋعا تىيىم سالىنعان. بۇگىننەن باستاپ قالا ىشىندە ازىق-تۇلىك دۇكەندەرى مەن ءدارىحانالار عانا جۇمىس ىستەپ تۇر.
پىكىر قالدىرۋ