بۇل تۋرالى الماتى وبلىسى اكىمدىگى وكىلدەرىمەن وتكەن توتەنشە جاعدايعا بايلانىستى ەنگىزىلگەن قوسىمشا قاۋىپسىزدىك جونىندەگى بريفينگتە ايتىلدى، دەپ حابارلايدى Qamshy.kz اقپارات اگەنتتىگى. 

بەلگىلى بولعانداي قاۋىپسىزدىك ەرەجەلەرى بويىنشا، 31 ناۋرىزدان باستاپ قوعامدىق جانە جەكە كولىكتەردىڭ قاتىناۋى توقتاتىلماق.

ساياباقتار، سكۆەرلەر، جاعالاۋلار، سپورتتىق كەشەندەر مەن بالالارعا ارنالعان ويىن الاڭدارى جابىلادى. مەكەمەلەر جۇمىسىن توقتاتىپ، قوسىمشا سانيتارلى پوستتار قويىلادى. اۋەجاي، اۋداندىق جانە قالالىق اۆتوبەكەتتەر، اۋدانارالىق قوعامدىق كولىكتەر ءوز جۇمىسىن توقتاتادى دەلىنگەن.

سونىمەن بىرگە، جەكە تاسىمالداۋشى كولىكتەردىڭ قوزعالىسىنا دا تىيىم سالىنىپ، تەك رەسمي تاكسي قىزمەتىن پايدالانۋعا عانا رۇقسات ەتىلمەك.

ىندەتتە بايلانىستى ەنگىزىلگەن ەرەجەنى بۇزعان ازاماتتار 15 تاۋلىككە قاماۋعا الىنىپ، 10 ايلىق ەسەپتىك كورسەتكىش كولەمىندە ايىپپۇل سالىنادى.

ەسكە سالا كەتەيىك، قازىرگى تاڭدا الماتى وبلىسى بويىنشا شەتەلدەن كەلگەن 623 ادام وقشاۋلانعان. ونىڭ ىشىندە، 163ء-ى ستاسيوناردا، 460-ى ءۇي كارانتينىنە الىنعان. 360 ادامنىڭ لابوراتوريالىق تەكسەرىسىنىڭ ناتيجەسىندە 8 ادامنىڭ اۋرۋ جۇقتىرعانى انىقتالىپ، ولارمەن قاتىناستا بولعان 65 ادام وقشاۋلانعان.