بۇگىن، 31 ناۋرىزدا نۇر-سۇلتان قالاسىندا كوروناۆيرۋس جۇقتىرعان تاعى ءبىر ادام كوز جۇمدى. بۇل اقپاراتتى قالالىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا حابارلادى.

ونىڭ ايتۋىنشا، كوز جۇمعان ادامنىڭ جاسى 50-دە بولعان. 21 ناۋرىزدا اۋرۋحاناعا جاتقىزىلعان.

"ءبىر اي اۋىرىپ، مەديسينالىق كومەككە جۇگىنبەگەن. جۇمىسى جەكە ىسساپارلارمەن بايلانىستى بولعان. ونىمەن جاقىن ارالاسقان وتباسى مۇشەلەرى جانە ارىپتەستەرى بارلىعى 31 ادام اۋرۋحاناعا جاتقىزىلدى" دەدى قيسىقوۆا.

قيسىقوۆانىڭ ايتۋىنشا، مارقۇمنىڭ ەكى تۋىسىنان كوروناۆيرۋس تابىلعان. 

ءقازىر قازاقستاندا كوروناۆيرۋستان قايتىس بولعاندار ەكى ادامعا جەتتى. بۇعان دەيىن 26 ناۋرىزدا اقمولا وبلىسى قوسشى اۋىلىندا 64 جاستاعى ايەل ادام كوز جۇمعان ەدى. 

رەسمي اقپارات بويىنشا،  ءقازىر ەلدە كوروناۆيرۋس جۇقتىرعاندار سانى 325-كە جەتكەن. ولاردىڭ ەكەۋى كوز جۇمسا، 22 ادام كوروناۆيرۋستان جازىلىپ شىقتى.