الماتى قالاسى اكىمدىگىنىڭ باسپا ءسوز ورتالىعىندا قالالىق قوعامدىق دەنساۋلىق باسقارماسىنىڭ باسشىسى تىلەۋحان ابىلدايەۆ مەگاپوليستەگى جاعدايعا بايلانىستى بريفينگ وتكىزدى.

– قازىرگى ۋاقىتتا الماتىدا كوروناۆيرۋستىق ينفەكسيانى جۇقتىرۋدىڭ راستالعان 82 جاعدايى تىركەلدى. ونىڭ ىشىندە جەتى ادام ستاسيوناردا ەمدەلىپ، 14 كۇندىك ءۇي كارانتينىنە شىقتى. ولاردىڭ قاتارىندا ءتورت ەر ادام، ەكى ايەل جانە ءبىر بالا بار، – دەدى ت. ابىلدايەۆ.

بۇگىندە قالالىق جۇقپالى اۋرۋلار اۋرۋحاناسىندا بارلىعى 76 ناۋقاس كوروناۆيرۋستان ەمدەلىپ جاتىر، ونىڭ ىشىندە 2ء-ى بالا بار.

ت. ابىلدايەۆتىڭ ايتۋىنشا، ەمدەۋگە جاتقىزىلعانداردىڭ ءبىرى الماتى وبلىسىنىڭ تۇرعىنى. 1971 جىلى تۋعان ازاماتشا جرۆي بەلگىلەرىمەن جاعدايى ناشارلاپ، الماتىداعى كوپبەيىندى كلينيكالىق اۋرۋحاناسىنا جۇگىنگەن.

– وعان بەلگىلى ءبىر زەرتتەۋلەر جۇرگىزىلدى. ناتيجەسىندە ەكىجاقتى تومەنگى دارەجەلى پنيەۆمونيا انىقتالدى. سونداي-اق COVID 2019-عا تالداۋلار الىنىپ، ناتيجەسى راستالدى. 30-ى كۇنى ول ءبىزدىڭ قالالىق جۇقپالى اۋرۋلار اۋرۋحاناسىنا ەمدەۋگە جاتقىزىلدى، – دەدى ت.ابىلدايەۆ .

بۇگىندە 66 ناۋقاستىڭ جاي-كۇيى قاناعاتتانارلىق. ءبىر ەرەسەك ناۋقاستىڭ جاي-كۇيى اۋىر جاعدايدا قالىپ وتىر. ال 9 ەرەسەك ادامنىڭ دارەجەسى ورتاشا (1 وبلىستىق) دەپ باعالانىپ وتىر.

– ەكى جاسار بالانىڭ جاي-كۇيى جاقسارىپ، قاناعاتتانارلىق جاعدايعا جەتتى. بۇگىن سوڭعى تالداۋلارىن كۇتىپ وتىرمىز. ەگەر تالداۋى تەرىس ناتيجە بەرسە، وندا اۋرۋحانادان شىعارۋعا دايىنبىز، –  دەدى ول.

ال جاڭادان انىقتالعان توعىز ادامنىڭ بارلىعى باسقا جاقتان كەلگەن ادامدار. 30 ناۋرىزدا ىستامبۇل – الماتى رەيسىمەن بەس ادام ۇشىپ كەلدى. التىنشى ناۋقاس 29 ناۋرىز كۇنى مينسك – الماتى رەيسىمەن جانە وسى ايدىڭ ءار كۇندەرىندە دۋبايدان تاعى ءۇش ادام ۇشىپ كەلگەن ەكەن.

بۇگىندە پروۆيزورلىق ورتالىقتاردا 697 ادام كارانتيندە جاتىر. ونىڭ ىشىندە – 84 بالا بار. ەكى كۇندىك كارانتيندە 1029 ازامات جانە 3156 ادام ءۇي كارانتينىندە جاتىر.