جامبىل وبلىسىنىڭ اكىمى بەردىبەك ساپاربايەۆ توتەنشە جاعداي تارتىبىندە وڭىردەگى قاشىقتان ءبىلىم بەرۋ بويىنشا جۇرگىزىلگەن جۇمىستاردى سىنعا الدى، دەپ حابارلايدى Qamshy.kz اقپارات اگەنتتىگى جامبىل وبلىسى اكىمىنىڭ باسپا ءسوز قىزمەتى دەرەگىنە سۇيەنىپ.

بەلگىلى بولعانداي، ساپاربايەۆ جيىندا قاشىقتان ءبىلىم بەرۋ بويىنشا اتقارىلۋى ءتيىس جۇمىستاردى تالقىلاپ، كەم-كەتىكتەردى سىن-تەزىنە العان.

«كوزبوياۋشىلىقپەن اينالىسۋدى توقتاتىڭىزدار. ناقتى احۋالدى كورسەتىڭىزدەر. ايتپەسە، ءبىز جاعدايدى جاقسارتا المايمىز. بۇل تەك ءبىلىم بەرۋدە عانا ەمەس، وڭىردەگى بارلىق سالاعا قاتىستى»، - دەدى ايماق باسشىسى.

"اۋدان" دەمەكشى، وسىدان ءبىراز ۋاقىت بۇرىن وبلىس اكىمى بايزاق اۋدانىنا جۇمىس ساپارىمەن بارعان. وندا ول  جەرگىلىكتى مەكتەپتەردىڭ بىرىندە بولىپ، وقۋ ورداسىنداعى تەحنيكالىق بازانىڭ ادام شوشىرلىق دەڭگەيدە ەكەنىن بايقاعان.

جيىن بارىسىندا بۇنداي كەمشىلىكتەردى قايىرا ەسكە سالعان بەردىبەك ماشبەك ۇلى وڭىردەگى ءبىلىم ساپاسىن جەتىلدىرۋ بويىنشا جۇمىستاردىڭ سىن كوتەرمەيتىنىن ايتقان.

«تارازعا جاقىن ورنالاسقان اۋداندارداعى مەكتەپ وسىنداي بولسا، وندا شالعاي اۋماقتار تۋرالى نە ايتۋعا بولادى؟ مەملەكەت باسشىسىنىڭ قاشىقتان وقىتۋعا كوشۋ تۋرالى تاپسىرماسىن قالاي ىسكە اسىرامىز؟» – دەدى ب. ساپاربايەۆ.

وبلىس اكىمى الدىنداعى تالقىلاۋ بارىسىندا وڭىردە قاشىقتان وقىتۋ ماسەلەسىنىڭ كۇردەلى بولىپ وتىرعانى دا ايتىلماي قالماعان.

ماسەلەن، كوپتەگەن اۋدان مەكتەپتەرىندە كومپيۋتەرلەر مەن مونوبلوك جەتىسپەۋدە. بۇدان بولەك، تۇپ-تۋرا ۇزىن سانى 125 اۋىلدىق ەلدى مەكەن ينتەرنەتپەن قامتاماسىز ەتىلمەگەن. ال مۇنداي جاعدايدا ساپاربايەۆ اكىمدىگىنىڭ توتەنشە جاعداي تارتىبىندە پرەزيدەنت تاپسىرماسىنا وراي قاشىقتان وقىتۋ ماسەلەسى تۋرالى ايتۋدىڭ ءوزى ەرتە بولسا كەرەك-تى. 

وسى رەتتە، اۋىلدارداعى ينتەرنەت ماسەلەسىن شەشۋگە مۇمكىندىگى بار دەلىنگەن «قازاقتەلەكوم» اق ۇلتتىق بايلانىس وپەراتورىنىڭ وكىلى دە وبلىس باسشىسىن قۋانتا المادى. دالىرەك ايتقاندا، مۇنداي قىسقا ۋاقىتتا بۇل ماسەلەنى شەشۋگە قاتىستى ساپاربايەۆ ساۋالىنا رەسمي وكىل ناقتى جاۋاپ بەرە الماعان.

ناتيجەسىندە، بەردىبەك ساپاربايەۆتىڭ قاشىقتان ءبىلىم بەرۋ ماسەلەسىنە وراي ورىستەتكەن تالقىسى ادەتتەگىدەي وبلىستىق ءبىلىم باسقارماسى باسشىسىنىڭ مىندەتىن اتقارۋشى ءجاميلا بەكباتىروۆاعا تاپسىرمالار جۇكتەۋمەن اياقتالعان.