ءىرى ساۋدا وبەكتىلەرى، ساۋدا ويىن-ساۋىق ورتالىقتارى، كينوزالدار، تەاترلار، كورمەلەر، قوعامدىق تاماقتاندىرۋ، قوناق ءۇي، حوستەل جانە تۋريستىك قىزمەت وبەكتىلەرىن جىلدىڭ سوڭىنا دەيىن مۇلىك سالىعىنان بوساتۋ ورناتىلدى.

– سالىق سالۋدىڭ جالپى بەلگىلەنگەن تارتىبىندە جۇمىس ىستەيتىن جەكە كاسىپكەرلەر جىل سوڭىنا دەيىن جەكە تابىس سالىعىنان بوساتىلدى، – دەدى ر. دالەنوۆ.

سونىمەن قاتار، الەۋمەتتىك ماڭىزى بار ازىق-تۇلىك تاۋارلارى ءۇشىن قوسىلعان قۇن سالىعىنىڭ مولشەرلەمەسى 30 ناۋرىزدان 1 قازانعا دەيىنگى كەزەڭگە 12%-دان 8%-عا دەيىن تومەندەتىلدى.

ۇلتتىق ەكونوميكا ءمينيسترىنىڭ ايتۋىنشا، شاعىن جانە ورتا بيزنەستى ەڭبەكاقى تولەۋ قورىنان الىناتىن سالىق جانە الەۋمەتتىك تولەمدەردەن (جەكە تابىس سالىعى، الەۋمەتتىك سالىق، مىندەتتى زەينەتاقى جارنالارى، مىندەتتى مەديسينالىق ساقتاندىرۋ جانە الەۋمەتتىك اۋدارىمدار) 6 ايعا بيىلعى 1 قازانعا دەيىن بوساتۋ قاراستىرىلعان.

بۇل شارا تۋريستىك قىزمەت، قوعامدىق تاماقتانۋ، قوناق ءۇي بيزنەسى سالالارىن، ءىرى ساۋدا وبەكتىلەرىن، ساۋدا ويىن-ساۋىق ورتالىقتارىن، كينوزالدار، تەاترلاردى، كورمەلەر مەن دەنە شىنىقتىرۋ-ساۋىقتىرۋ جانە سپورت عيماراتتارىن، كولىك قىزمەتتەرىن، كونسۋلتاسيالىق قىزمەتتەر مەن اقپاراتتىق تەحنولوگيالاردى، تاماق ونىمدەرىن وتكىزۋ مەن ءدارىحانالاردى قوسپاعاندا ساۋدا سۋبەكتىلەرىن قامتيدى.

بۇدان باسقا، توتەنشە جاعداي كەزەڭىندە سالىقتىق تەكسەرۋلەر مەن سالىق، كەدەن جانە الەۋمەتتىك تولەمدەر بويىنشا بەرەشەكتى ماجبۇرلەپ ءوندىرۋ توقتاتىلدى. جالپى، جوعارىدا كورسەتىلگەن بارلىق شارالار 700 مىڭ سالىق تولەۋشىنى قامتىيدى.