«Birgemiz» قوعامدىق قورى تۇسكەن قاراجات پەن ايماقتار بويىنشا كورسەتىلگەن كومەك تۋرالى بارلىق اقپارات تۇراقتى تۇردە جاريالانىپ وتىراتىن birgemiz2020.kz رەسمي سايتىن ىسكە قوستى. پورتالدى ەرىكتىلەر تەگىن جاساپ بەردى.

مۇندا بارلىق قايىرىمدىلىق ارەكەتتەرى بولەك باعاندا كورسەتىلەدى جانە ول قاراجاتتىڭ تۇسۋىنە قاراي جاڭارتىلىپ وتىرادى. كومپانيالاردىڭ جارنالارى «قايىرىمدىلىق جاساۋشىلار مەن سەرىكتەستەر» سەگمەنتىندە كورسەتىلگەن. سونىمەن قاتار، ورىن العان جاعدايعا بەيجاي قارامايتىن قازاقستاندىقتار سايتتا كورسەتىلگەن دەرەكتەمەلەر بويىنشا، ەرىكتى بولۋعا نەمەسە قارجىلىق كومەك جىبەرۋگە ءوتىنىش قالدىرۋ مۇمكىندىگىنە يە بولادى.

سونداي-اق ۇيىمنىڭ سايتىندا ءاربىر ايماقتىق قور تۋرالى اقپاراتتار بەرىلەدى. مۇندا مۇقتاج ادامدار ءوز وڭىرىندەگى قورمەن تىكەلەي بايلانىسىپ، سۇراقتارىن قويا الۋ ءۇشىن، جەرگىلىكتى جەردەگى جاۋاپتى تۇلعالار مەن ولاردىڭ بايلانىس مالىمەتتەرى كورسەتىلەدى.

«ءبىز ءۇشىن قور جۇمىسىنىڭ اشىقتىعىن كورسەتۋ وتە ماڭىزدى. سوندىقتان سايتقا كىرۋشىلەردىڭ ءاربىرى بۇل جەردەن بانكتىك ءۇزىندى كوشىرمەلەرىمەن بىرگە ۇسىنىلاتىن ەسەپتەردى تابا الادى. قيىن كۇندەردە وتانداستارىمىزدى قولداۋ ءۇشىن قايىرىمدىلىق جاساعان بارلىق قازاقستاندىقتارعا جانە ەلىمىزدىڭ كومپانيالارىنا العىس ايتامىز» دەدى قور ءتوراعاسى رۋسلان ساكەيەۆ.

ەسكە سالا كەتەيىك، «Birgemiz» قوعامدىق قورى ەلىمىزدىڭ تۇڭعىش پرەزيدەنتى نۇرسۇلتان نازاربايەۆتىڭ باستاماسىمەن، COVID-19 پاندەمياسى جاعدايىندا تۇرعىنداردىڭ الەۋمەتتىك ءالسىز توپتارىن قولداۋ ماقساتىندا 2020 جىلدىڭ 20 ناۋرىزىندا قۇرىلدى.

قازاقستاندىقتارعا ۇندەۋىندە ەلباسى مەملەكەتتىك دەڭگەيدە قابىلدانىپ جاتقان شارالار قازىرگى قيىن احۋالعا ساي دەر كەزىندە قولعا الىنعانىن اتاپ ءوتتى. سونىمەن قاتار، ول وسىناۋ سىن ساعاتتا ورتاق ىستەن ەشكىم دە سىرت قالماۋعا ءتيىس ەكەنىن ايتتى.

«زاۋالدى ەڭسەرۋ ءۇشىن باسقا دا قوسىمشا رەسۋرستاردى جۇمىلدىرعان ءجون. ءاربىر ازامات ءوزىنىڭ قولىنان كەلەتىن ۇلەسىن قوسۋعا ءتيىس. مەن بۇل قيىن كەزەڭدە ەل-جۇرتقا كومەكتەسكىسى كەلەتىن جانە جاردەم بەرە الاتىن ادامداردىڭ قاراجاتى جيناقتالاتىن رەسپۋبليكالىق قور قۇرۋدى ۇسىنامىن. جالپى، كوروناۆيرۋسقا قارسى كۇرەسكە ارنالعان قاراجاتتىڭ دۇرىس جۇمسالۋىن «Nur Otan» پارتياسى باقىلاۋىندا ۇستايدى دەپ ويلايمىن. ەلىمىزدىڭ كومەككە مۇقتاج ءاربىر ازاماتىنا قامقورلىق كورسەتىلۋى ءتيىس» دەدى نۇرسۇلتان نازاربايەۆ.

ءوز كەزەگىندە قور جۇمىسىنىڭ اشىقتىعى مەن ەسەپتىلىگىن قامتاماسىز ەتۋ ءۇشىن، قۇرامىنا بەلگىلى قوعام جانە مەملەكەت قايراتكەرلەرى، ازاماتتىق قوعام وكىلدەرى مەن جاستار كىرەتىن قامقورشىلىق كەڭەسى باقىلاۋ جۇرگىزەتىن بولىپ شەشىلدى. وبەكتيۆتى جۇمىس ىستەپ، قور قارجىسىن ءبولۋ ءۇشىن باسشىلىققا الىناتىن نەگىزگى 10 قاعيدات بەكىتىلدى. اتاپ ايتقاندا:

- ەرىكتى جارنالار مەن قايىرمالدىق كومەك؛

- ادرەستىلىك (حالىقتىڭ الەۋمەتتىك ءالسىز توپتارىن، جاسىنا بايلانىستى COVID-19 جۇقتىرۋ ءقاۋپى جوعارى جانداردى، كوروناۆيرۋستىڭ زاردابىن شەككەن جانە الەۋمەتتىك-ەكونوميكالىق قيىندىقتارعا ۇشىراعان تۇرمىسى تومەن قازاقستاندىقتاردى قولداۋ)؛

- كومەكتىڭ ادىلدىگى؛

- قولما-قول اقشاسىز جانە بايلانىسسىز كومەك؛

- قور قىزمەتى ينفەكسيانىڭ تارالۋىنا بايلانىستى ەلدەگى تج-دىڭ ۇزاقتىعىمەن شەكتەلەدى؛

- قور قاراجاتىنىڭ ماقساتتى جۇمسالۋى (اكىمشىلىك، ۇيىمداستىرۋشىلىق شىعىستارى «Nur Otan» پارتياسىنىڭ قايتارىمسىز كومەگى ەسەبىنەن وتەلەدى)؛

- ۇنەمدىلىك جانە تيىمدىلىك (قاجەتتى تاۋارلاردى ساتىپ الۋ كەزىندە ونىڭ باسەكەلىك نەگىزدە ساپاسى مەن قۇنىنىڭ وڭتايلى قاتىناسى تالاپتارىن ساقتاۋ)؛

- قازاقستاندىق وندىرۋشىلەردى قولداۋ؛

- قور قاراجاتى مەن مەملەكەتتىك بيۋدجەت اراسىنىڭ ناقتى اجىراتىلۋى؛

- قور قىزمەتىنىڭ اشىق جانە ايقىن جۇرگىزىلۋى (باق-تا ەسەپ بەرۋ،  ەسەپتەردى سايتتا جاريالاۋ).