قازاقستاننىڭ دەنساۋلىق ساقتاۋ مينيسترلىگى نۇر-سۇلتان، الماتى جانە شىمكەنت سىندى ۇلكەن قالالاردا كەمىندە 3 تەز تۇرعىزىلاتىن جۇقپالى اۋرۋلار اۋرۋحاناسىن سالۋ قاجەت دەگەن ۇسىنىس جاسادى. بۇل تۋرالى ەلجان ءبىرتانوۆ Facebook پاراقشاسىندا جازدى.
– اۋرۋحانالاردىڭ ينفەكسيالىق قاۋىپسىزدىك تالاپتارىنا ساي بولۋى وتە ماڭىزدى: بوكستالعان پالاتالار، جەلدەتۋ جۇيەسى، ونىڭ ىشىندە رەانيماسيالىق پالاتالاردا قىسىم بولماۋى ءتيىس، ايماقتاردى "تازا" جانە "لاس" دەپ ءبولۋ قاجەت. ءبىز قىتايدىڭ تەز سالىناتىن اۋرۋحانالاردى قالاي پايدالانعانىن كوردىك. ال اقش، يتاليا جانە باسقا ەۋروپالىق ەلدەردە كۇندەلىكتى قولدانىستاعى اۋرۋحانالارعا ۇلكەن اۋىرپالىق تۇسگەنىن دە بىلەمىز. كوپتەگەن مەملەكەت پاسيەنتتەر مەن مەديسينا قىزمەتكەرلەرىنىڭ دەنساۋلىعى ءۇشىن ينفەكسيالىق قاۋىپسىزدىك تەحنولوگياسى جوق وبەكتىلەردى، سپورت عيماراتتارىن پايدالانۋعا ءماجبۇر بولدى، – دەدى ءبىرتانوۆ.
دەنساۋلىق ساقتاۋ مينيسترلىگى نۇر-سۇلتان، الماتى جانە شىمكەنت سىندى ۇلكەن قالالاردا كەمىندە ءۇش تەز تۇرعىزىلاتىن جۇقپالى اۋرۋلار اۋرۋحاناسىن (ءبىرىنشى كەزەڭدە 200-300 ورىندىق) سالۋ قاجەت دەگەن ۇسىنىس جاساعانىن اتاپ ءوتتى.
– بىزگە وتاندىق قۇرىلىس كومپانيالارى قولداۋ كورسەتتى. قىسقا مەرزىمدە (15-20 كۇن ىشىندە) قۇرىلىستى اياقتاۋ جوسپارلانۋدا. جەدەل تەحنولوگيالار، دايىن بلوكتىق-مودۋلدىك شەشىمدەر، زاماناۋي ينفەكسيالىق قاۋىپسىزدىك جۇيەلەرى پايدالانىلادى، مەديسينالىق جانە زەرتحانالىق جابدىقتار ورناتىلادى، – دەدى مينيستر الەۋمەتتىك جەلىدەگى پاراقشاسىندا.
ءمينيستردىڭ ايتۋىنشا ەلىمىزگە بۇل شارالار كوروناۆيرۋس پاندەمياسىن عانا ەمەس، سونداي-اق بولاشاقتا وزگە دە ىندەتتەرگە قارسى تۇرىپ، ونى دەر كەزىندە جويۋعا مۇمكىندىك بەرەتىنىن اتاپ ءوتتى.
– كوروناۆيرۋس پاندەمياسىنا قارسى قابىلدانعان شارالارعا تۇسىنىستىكپەن قاراپ، ءبىزدى قولداعان حالقىمىزعا العىس بىلدىرەمىن. سونىمەن قاتار، تەك رەسمي اقپاراتقا كوڭىل ءبولىپ، جاۋاپتى مامانداردىڭ پىكىرىنە عانا قۇلاق اسۋلارىڭىزدى سۇرايمىن. توتەنشە جانە شۇعىل شارالاردىڭ بارلىعى ەل ازاماتتارىنىڭ دەنساۋلىعى ءۇشىن قابىلداندى! ءبىز جەڭەمىز! ءبىز بىرگەمىز! ، – دەپ ەلجان ءبىرتانوۆ ءسوزىن تويىندەدى.
پىكىر قالدىرۋ