الماتىدا ليفت باتىرماسىنا تۇكىرگەن بۇزاقى جىگىت جاۋاپقا تارتىلدى، – دەپ حابارلادى Polisia.kz.

الەۋمەتتىك جەلىدە الماتى قالاسىنداعى تۇرعىن ءۇي كەشەنىندەگى ليفت باتىرماسىنا تۇكىرگەن بەلگىسىز جىگىتتىڭ ۆيدەوسى تارالدى. ونىڭ بۇل ارەكەتى «الاتاۋ سيتي» تۇرعىن ءۇي كەشەنىندەگى ءليفتىنىڭ باقىلاۋ كامەراسىنا ءتۇسىپ قالعان.

– ونىڭ ءاتى-جونى كىم ەكەنى انىقتالدى، ول پوليسياعا جەتكىزىلىپ، ق ر اقبك 434-بابىنداعى (ۇساق بۇزاقىلىق) قۇقىق بۇزۋشىلىق بەلگىسى بويىنشا اكىمشىلىك جاۋاپكەرشىلىككە تارتىلدى. شەشىم قابىلداۋ ءۇشىن ءىس ماتەريالدارى سوتقا جىبەرىلدى، – دەپ مالىمدەدى الاتاۋ اۋداندىق پوليسيا باسقارماسى باسشىسىنىڭ مىندەتىن اتقارۋشى ءىلياس ومىرسەرىكوۆ.

بۇزاقى ىستەگەن ارەكەتىنە وكىنەتىنىن ايتىپ، كەشىرىم سۇرادى.

– اشۋ ۇستىندە ليفت باتىرماسىنا تۇكىردىم. وسىعان بايلانىستى بارلىعىنان، سونىڭ ىشىندە تۇرعىن ءۇي كەشەنىنىڭ تۇرعىندارىنان كەشىرىم سۇرايمىن، – دەدى ا. ەسىمدى جىگىت.