13 ساۋىردە ەكىقابات ايەل جۇكتىلىگىنىڭ 39-شى اپتاسىندا ۆيرۋس جۇقتىرعان ناۋقاسپەن بايلانىستا بولعان ادام رەتىندە №1 قالالىق كلينيكالىق اۋرۋحاناسىنا جەتكىزىلدى. جۇكتى ايەلدەن كوروناۆيرۋسقا قارسى اناليز الىنىپ، ناتيجەسى وڭ بولىپ شىقتى. 15 ساۋىردە دارىگەرلەر اناليز كورسەتكىشتەرى بويىنشا وعان كەسار تىلىگى وتاسىن جاساپ، بوساندىرىپ الادى. ناتيجەسىندە سالماعى 3،5 كەلىدەن اساتىن ۇل بالا دۇنيەگە كەلدى. بۇل ناۋقاستىڭ ەكىنشى بوسانۋى ەكەن.

– جاڭا تۋعان نارەستەدەن الىنعان تالداۋلار تەرىس ناتيجە كورسەتتى. نارەستەنىڭ دەنى ساۋ. ءقازىر ول بالالار بولىمشەسىندە جاتىر، – دەدى الماتى قالاسى قوعامدىق دەنساۋلىق باسقارماسىنىڭ باسشىسى تىلەۋحان ابىلدايەۆ.

بوسانعان ايەلدىڭ جاي-كۇيى قاناعاتتانارلىق. جۋىردا ول ەمدەلۋىن جالعاستىرۋ ءۇشىن ينفەكسيالىق ستاسيونارعا اۋىستىرىلادى. ناۋقاس ءقاۋىپتى ىندەتتەن تولىق ساۋىعىپ شىققاننان كەيىن عانا ۇلىمەن قاۋىشا الادى.

ايتا كەتۋ كەرەك، №1 قالالىق كلينيكالىق اۋرۋحانادا پروۆيزورلىق ورتالىق قۇرىلعان. بۇل اۋرۋحانادا ءقاۋىپتى ىندەتتى جۇقتىرعان جۇكتى ايەلدەر بوسانادى.