بۇگىنگە دەيىن 784 مىڭنان استام الماتىلىق توتەنشە جاعداي كەزىندە تابىسىنان ايىرىلعاندارعا ارنالعان 42 500 تەڭگەلىك جاردەماقىعا ءوتىنىم بىلدىرگەن. 238 مىڭ تۇرعىننىڭ ءوتىنىمى كەيىنگە قالدىرىلسا، قالعاندارىنا الەۋمەتتىك تولەم تاعايىندالعان.

جاردەماقىعا قولجەتكىزگەندەردىڭ ءبىرى – وتەگۇل قالقامان قىزى. الماتىداعى بايسات بازارىندا ويىنشىق ساتادى. كارانتين باستالعالى ۇيدە وتىر. "42500 تەڭگە قيىن-قىستاۋ كەزەڭدە حالىققا اجەپتاۋىر قولداۋ بولدى" دەگەن ول كورسەتىلگەن كومەك ءۇشىن ۇكىمەتكە ءدان ريزا.

– وسىنداي ءىستىڭ جۇزەگە اسۋى ۇكىمەتتە وتىرعان ادامداردىڭ حالىققا دەگەن جاناشىرلىعى دەپ بىلەمىن. ەشقايسىمىزدى ۇيدەن شىعارماستان، جاردەماقىنى كارتوچكامىزعا اۋدارىپ بەرە قويدى. كارانتين كەزىندەگى قاۋىپسىزدىك شارالارىن قاتاڭ قاداعالاپ، حالىقتىڭ قاۋىپسىزدىگىن قامتاماسىز ەتىپ جاتقانىن وسىدان-اق كورۋگە بولادى، – دەدى ول.

وتەگۇل قالقامان قىزى جاردەماقىنى ەكىنشى وتىنىمنەن  كەيىن العانىن ايتىپ، 42500 تەڭگەنىڭ ءتۇسۋىن توسىپ جۇرگەندەردى سابىرعا شاقىردى.

– ەڭ باستىسى سابىر ساقتاپ، كۇتىڭىزدەر. توتەنشە جاعدايعا بايلانىستى شىنىمەن دە تابىسىڭىزدان ايىرىلىپ، جۇمىسىڭىز توقتاپ قالسا، وندا جاردەماقى مىندەتتى تۇردە بەرىلەدى. مەملەكەت سىن ساعاتتا ەشكىمدى دالادا قالدىرمايدى. سوندىقتان ۋايىمداماي، كارانتين تالاپتارىن ورىنداپ، توسىننان كەلگەن سىناقتان امان-ەسەن وتۋگە، قالىپتى ومىرگە ورالۋعا ءارقايسىمىز اتسالىسايىق، – دەيدى ءو. قالقامان قىزى.