قازاقستاننىڭ "قىزىل جارتى اي" ۇيىمى قازاقستان رەسپۋبليكاسى سىرتقى ىستەر مينيسترلىگىنىڭ جانە حالىقارالىق جۇڭگو ساۋدا پالاتاسىنىڭ، Jiangsi 3L Medical Products Group كومپانيالار توبى مەن سزيانسي مىس ونەركاسىپتىك توبىنىڭ قولداۋىمەن قازاقستاننىڭ مەديسينالىق مەكەمەلەرىنە، الماتى قالاسىنىڭ توتەنشە جاعداي جانە پوليسيا دەپارتامەنتىنە مەديسينالىق ماسكالار جەتكىزدى.
قىتايدىڭ حالىقارالىق ساۋدا پالاتاسى مەن سزيانسيلىك كومپانيا قازاقستاننىڭ قىزىل جارتى اي ۇيىمىنا 228 880 دانا مەديسينالىق ماسكا بەرگەن. ولار ۇيىمنىڭ ايماقتىق فيليالدارىنا، مەديسينالىق قىزمەتتەرگە، توتەنشە جاعداي دەپارتامەنتى مەن ىشكى ىستەر دەپارتامەنتى بولىمدەرىنە ۇلەستىرىلگەن.
مەديسينالىق ماسكالاردى الماتى قالاسىنا جەتكىزۋ مەن تەحنيكالىق كومەك كورسەتۋ تىكەلەي سىرتقى ىستەر مينيسترلىگى جانە دەنساۋلىق ساقتاۋ مينيسترلىگى قولداۋىنىڭ ارقاسىندا جۇزەگە اسىرىلدى.
– قازاقستاننىڭ "قىزىل جارتى اي" ۇيىمى ماسكالاردى جەتكىزگەن ءاربىر ادامعا، ونىڭ ىشىندە جۇڭگو ساۋدا پالاتاسىنا، سزيانسيلىك كومپانيالار توبىنا العىسىن بىلدىرەدى. تاۋار جەتكىزۋ ىسىنە بەلسەنە قاتىسقان قازاقستان رەسپۋبليكاسى سىرتقى ىستەر مينيسترلىگى مەن دەنساۋلىق ساقتاۋ مينيسترلىگىنە العىسىمىز ەرەكشە. وسىنداي قيىن ساتتە دوستىق پەن ادامگەرشىلىك ۇدەسىنەن شىعۋ – ەڭ قىمبات دۇنيە دەپ ويلايمىن، – دەدى ۇيىمىنىڭ پرەزيدەنتى ەركەبەك ارعىمبايەۆ.
قازاقستاننىڭ "قىزىل جارتى اي" ۇيىمى مەملەكەتكە كومەكشى مەكەمە رەتىندە مەملەكەتتىك ورگاندارعا مەيلىنشە جاردەمدەسپەك.
– كەلىپ تۇسكەن ماسكالار كوروناۆيرۋسپەن كۇرەستە الدىڭعى شەپتە جۇرگەن ءتارتىپ ساقشىلارى، مەديسينا قىزمەتكەرلەرى مەن ءبىزدىڭ ەرىكتىلەردىڭ قاۋىپسىزدىگىن قامتاماسىز ەتۋگە قىزمەت قىلۋعا ءتيىس. ءبىز وسىلايشا ورتاق ىسكە ءوز ۇلەسىمىزدى قوسقىمىز كەلەدى، – دەيدى كومپانيا وكىلى.
ماسكالار تومەندەگى ءتىزىم بويىنشا ۇلەستىرىلەدى.
- قجا الماتى وبلىستىق فيليالى – 5000؛
- قازاقستان شيپاجايى – 2000؛
- ق ر وكز 14 فيليالى – 42 000؛
- كپك شتاپ-پاتەرى – 10 000؛
- ۇلتتىق ۇلان – 10000؛
- الماتى ءىىد – 10،000؛
- الماتى قالالىق دەنساۋلىق ساقتاۋ باسقارماسى – 35،000؛
- الماتىداعى توتەنشە جاعدايلار دەپارتامەنتى – 5000 ادام؛
- الماتىداعى ەرىكتىلەر شتابى – 10،000؛
- نۇر-سۇلتان قجا فيليالى – 5000؛
- نۇر-سۇلتان قالاسى دەنساۋلىق ساقتاۋ باسقارماسى – 10 000؛
- قور – 6000.
قازاقستاننىڭ "قىزىل جارتى اي" ۇيىمى ازاماتتارعا جەكە باستىڭ گيگيەناسىن جانە كارانتين كەزىندەگى ءتارتىپ ەرەجەلەرىن ساقتاۋدى سۇرايدى.
– ازاماتتار تەك جەكە باسىن عانا ەمەس، اينالاسىنداعى ادامداردىڭ دا دەنساۋلىعىن ساقتاۋعا ءتيىس. ۇيدە قالۋ ارقىلى ءسىز ءوزىڭىزدىڭ دەنساۋلىعىڭىزدى قورعاپ، جاقىن ادامدارىڭىزعا ءقاۋىپ توندىرمەيسىز، – دەيدى كومپانيا پرەزيدەنت ەركەبەك ارعىمبايەۆ.
قازاقستاننىڭ "قىزىل جارتى اي" ۇيىمى – حالىقارالىق قىزىل كرەست جانە قىزىل جارتى اي ۇيىمدارىنىڭ ءبىر بولىگى. بۇل قوزعالىس ادام ءومىرى مەن دەنساۋلىعىن قورعاۋ، ءاربىر تۇلعانىڭ جەكە باسىن قۇرمەتتەۋدى قامتاماسىز ەتۋدى ماقساتى ەتىپ العان الەمدەگى ەڭ ءىرى بىرلەستىكتەردىڭ ءبىرى.
پىكىر قالدىرۋ