كيم چەن ىننىڭ جەرلەنگەنى تۋرالى جەرسەرىكتىك سۋرەت  جاريالاندى. بۇل تۋرالى قامشى ءتىلشىسى France24news-گە سىلتەمە جاساپ حابارلايدى.

France24news اقپاراتىنشا، سولتۇستىك كورەيا اسپانىنان تۇسىرىلگەن جەرسەرىكتىك سۋرەت جاريالانعان. جەرسەرىگى تۇسىرگەن سۋرەتتە كيم چەن ىندى جەرلەۋ شەرۋى بولىپ جاتقانعا ۇقسايدى، سەبەبى، سۋرەتتەردەگى شارالار 2011 جىلى ونىڭ اكەسى كيم چەن ير قايتىس بولعان كەزدەگىدەي كورىنىسكە ۇقساس.

جەرسەرىكتىك سۋرەتتەر بويىنشا، سولتۇستىك كورەيا جەتەكشىسى كيم چەن ىن كوز جۇمعاننان كەيىن ۇلكەن پاراد قۇرىلىمدارىن تۇرعىزىپ جاتقانى  بولجانۋدا.

 پلانەتا زەرتحانالارى جاريالاعان سۋرەتتەردە  اسكەري شەرۋلەرگە ءجيى قولدانىلاتىن ۋاقىتشا عيماراتتار بەينەلەنگەن. ولار استانا پحەنياندا 18 ساۋىردەن كەيىن ورناتىلعان.

ايتا كەتەيىك، كيم چەن ىن 11 ساۋىردەن بەرى كوپشىلىك الدىندا كورىنبەي كەتتى. بۇعان دەيىن سولتۇستىك كورەيا ليدەرىنىڭ جۇرەك وتاسىنان كوز جۇمعانى جايىندا اقپارات پايدا بولىپ،  ءتىپتى، ونىڭ اينەك تابىتتا جاتقان فوتوسى جاريالاندى. الايدا تابىتتاعى ادامنىڭ كيم چەن ىن ەكەنى نەمەسە فوتونىڭ ءتۇپنۇسقالىعى راستالمادى. كەرىسىنشە، كيم چەن ىننىڭ 27 ساۋىردە وڭتۇستىك افريكا پرەزيدەنتىنە جازعان قۇتتىقتاۋ حاتى جاريالاندى. سونداي-اق پحەنياننىڭ سوعىس جاتتىعۋلارىن كۇشەيتىپ جاتقانى حابارلاندى. ەكى كۇن بۇرىن ونىڭ وتباسىلىق پويىزىنىڭ سپۋتنيكتىك سۋرەتى جاريالانىپ، ونىڭ ءتىرى ەكەنى تۋرالى وڭتۇستىك كورەيا پرەزيدەنتىنىڭ كەڭەسشىسى سۇقبات بەردى. سولتۇستىك كورەيا باسىلىمدارى كيم چەن ىننىڭ قۇرىلىسشى جۇمىسكەرلەرگە العىس حات جولداعانىن جازدى. ال، ءۇش كۇن بۇرىن جۇڭگو مەديسينالىق توبىنىڭ سولتۇستىك كورەيا استاناسى پحەنيانعا جىبەرىلگەنىن حابارلاعانبىز. سونىمەن بىرگە، كيم چەن ىننىڭ ومىرىنە ۇلكەن ءقاۋىپ ءتونىپ تۇرعانىن، ونىڭ ورنىنا قارىنداسىنىڭ كەلۋى مۇمكىن ەكەنىن جانە سولتۇستىك كورەيا باسشىسىنىڭ ءولىمى يادرولىق سوعىس ءقاۋپىن تۋدىراتىنىن جازعانبىز.