بۇل تۋرالى وبلىستىق قوعامدىق كوممۋنيكاسيا ورتالىعىندا وتكەن بريفينگتە ماڭعىستاۋ وبلىسى ەنەرگەتيكا - تۇرعىن ءۇي كوممۋنالدىق شارۋاشىلىعى باسقارماسى باسشىسىنىڭ ورىنباسارى نۇرلان ورىنباساروۆ ءمالىم ەتتى.

ەلىمىزدە قابىلدانعان توتەنشە جاعدايعا بايلانىستى كوممۋنالدىق قىزمەت كورسەتۋشىلەرگە شىعىنداردى وتەۋ تۋرالى ەرەجەسىنە سايكەس، حالىقتىڭ الەۋمەتتىك وسال توبىنىڭ كەلەسى 7 ساناتى بويىنشا جەكە شوتى بار ادامدارعا كومەك بەرىلەدى:

1) 1،2،3ء-شى توپتاعى مۇگەدەكتەر؛

2) مۇگەدەك بالالاردى تاربيەلەپ وتىرعان وتباسىلار؛

3) كوپبالالى وتباسىلار؛

4) ۇلى وتان سوعىسىنىڭ مۇگەدەكتەرى مەن قاتىسۋشىلارى جانە ۇلى وتان سوعىسىنىڭ مۇگەدەكتەرى مەن قاتىسۋشىلارىنا تەڭەستىرىلگەن ادامدار؛

5) مەملەكەتتىك نەمەسە قوعامدىق مىندەتتەردى ورىنداۋ، اسكەري قىزمەت اتقارۋ كەزىندە، عارىش كەڭىستىگىنە ۇشۋدى دايىنداۋ نەمەسە جۇزەگە اسىرۋ كەزىندە، ادام ءومىرىن قۇتقارۋ، قۇقىقتىق ءتارتىپتى قورعاۋ كەزىندە قازا تاپقان ادامداردىڭ وتباسىلارى؛

6) ەڭ تومەنگى جانە ودان تومەن زەينەتاقى الاتىن زەينەتكەرلەر؛

7) اتاۋلى الەۋمەتتىك كومەك الاتىن ازاماتتار، سونىڭ ىشىندە جالعىز باستى زەينەتكەرلەر.

ماڭعىستاۋ وبلىسىندا حالىقتىڭ الەۋمەتتىك جاعىنان وسال توپتارىنا جاتاتىن 73 646 ادام بار، قازىرگى تاڭدا ءتيىستى كوممۋنالدىق قىزمەت كورسەتەتىن كاسىپورىندارمەن بىرلەسىپ ولاردىڭ قانشاسىندا جەكە شوت بار ەكەنى انىقتالۋدا.

 مو ەنەرگەتيكا - تۇرعىن ءۇي كوممۋنالدىق شارۋاشىلىعى باسقارماسى باسشىسىنىڭ ورىنباسارى نۇرلان ورىنباساروۆتىڭ ايتۋىنشا، مەملەكەت ءساۋىر جانە مامىر ايلارى ءۇشىن 15 مىڭ تەڭگەدەن كوممۋنالدىق قىزمەت اقىسىن تولەيدى. سوندىقتان ءوتىنىم بەرۋگە اسىعىپ، اۋرەگە تۇسپەۋگە شاقىرامىز. ويتكەنى، ءساۋىر ايىنىڭ تولەمدەرى مامىر ايىندا، تيىسىنشە مامىر ايىنىڭ تولەمدەرى ماۋسىم ايىندا جۇرگىزىلەتىندىگىن ەسكەرۋ قاجەت.

شىعىنداردى وتەۋ ەرەجەسىنە سايكەس تۇتىنۋشىلار جەكە سايكەستەندىرۋ ءنومىرى، الەۋمەتتىك مارتەبەسىن جانە جەكە شوت مالىمەتتەرىمەن ءوتىنىم بەرۋى ءتيىس.

حالىقتىڭ الەۋمەتتىك وسال توبىنىڭ مارتەبەسى راستالعان جاعدايدا جەرگىلىكتى اكىمدىك قاراجاتتاردى كوممۋنالدىق قىزمەت كورسەتۋشى مەكەمەلەردىڭ ەسەپ ايىرىسۋ شوتتارىنا اۋدارادى، ولار ءوز كەزەگىندە، ەسەپتى كوممۋنالدىق قىزمەتتەردىڭ كولەمىنە پروپورسيونالدى تۇردە جۇرگىزەدى.

كومەك جوعارىدا اتالعان ساناتتارعا جاتاتىن، ءوز اتىنا كوممۋنالدىق قىزمەت كورسەتۋشىمەن جاسالعان كەلىسىم-شارتى بار جانە كارانتين ەنگىزىلگەن ەلدى مەكەندەردە تۇراتىن ازاماتتارعا كورسەتىلەدى.

سونىمەن قاتار، مۇگەدەك بالالاردى تاربيەلەپ وتىرعان وتباسىلار، كوپبالالى وتباسىلار جانە مەملەكەتتىك نەمەسە قوعامدىق مىندەتتەردى ورىنداۋ، اسكەري قىزمەت اتقارۋ كەزىندە، عارىش كەڭىستىگىنە ۇشۋدى دايىنداۋ نەمەسە جۇزەگە اسىرۋ كەزىندە، ادام ءومىرىن قۇتقارۋ، قۇقىقتىق ءتارتىپتى قورعاۋ كەزىندە قازا تاپقان ادامداردىڭ وتباسى مۇشەلەرىنىڭ بىرەۋىندە جەكە شوتى بولسا دا تولەنەدى.

 ايتا كەتەتىن ءجايت، «تۇرعىن ءۇي قاتىناستارى تۋرالى» زاڭىنىڭ 2-بابىنا سايكەس كوممۋنالدىق تولەمدەر - سۋ، جىلۋ، گاز، ەلەكتر ەنەرگياسى، قوقىس شىعارۋ جانە ليفت قىزمەتتەرى  ءۇشىن تولەنەدى.

كوممۋنالدىق قىزمەت شىعىندارىن وتەۋ رەتىندەگى كومەكتى الۋ ءۇشىن تۇتىنۋشى ءوزىنىڭ ءوتىنىشىن جۇمىس ۋاقىتىندا ساعات 09.00-دەن 18.00-گە دەيىن جەرگىلىكتى اكىمدىك جانىنان اشىلعان call-ورتالىقتاردىڭ نومىرلەرى بويىنشا حابارلاسىپ، راستاۋى قاجەت.

اتالعان جۇمىستاردى ۇيىمداستىرۋ قالالار مەن اۋداندار اكىمدىكتەرىمەن جۇرگىزىلۋدە جانە باسقارمانىڭ تۇراقتى باقىلاۋىندا.