تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداعاسىموۆا الماتىدا COVID-19 ينفەكسياسىنا تەكسەرىلۋ كونتينگەنتى كەڭەيتىلگەنىن مالىمدەدى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

– قازىرگى تاڭدا ءبىز كوروناۆيرۋستىق ينفەكسيانىڭ بەلەڭ الىپ كەتپەۋى ءۇشىن، ءقاۋىپتى ىندەت بويىنشا تەكسەرىلەتىن ادامداردىڭ كونتينگەنتىن كەڭەيتتىك. سونىڭ ناتيجەسىندە اۋرۋدى جۇقتىرعان ناۋقاستاردى ۋاقىت وزدىرماي دەر شاعىندا انىقتاپ، وقشاۋلاۋعا مۇمكىندىك تۋىپ وتىر. ءقازىر بانك قىزمەتكەرلەرى، بازارلاردا تۇراتىن ادامدار، قۇقىق قورعاۋ ورگاندارىنىڭ وكىلدەرى دە تەكسەرۋدەن وتەدى.

بۇگىنگى تاڭدا قۇرلىق اسكەرلەرى اسكەري ينستيتۋتىنىڭ 383 قىزمەتكەرى تەكسەرىلدى. سونداي-اق، "جۇلدىز"، "جاسىل بازار"، "ماگنۋم" ساۋدا ورىندارىنىڭ وكىلدەرى اراسىندا دا مەديسينالىق تەكسەرۋ جالعاسۋدا. COVID-19-دى انىقتاۋ ماقساتىندا جاپپاي تەكسەرىلۋ قالاداعى كوروناۆيرۋستىق ينفەكسيانىڭ جاسىرىن وشاقتارىن انىقتاۋعا كومەكتەسەدى، – دەدى ا. مولداعاسىموۆا.

سپيكەردىڭ سوزىنە سۇيەنسەك، الماتىدا ءبىر كۇندە COVID-19 ينفەكسياسىنا 1064 ادام تەكسەرۋدەن ءوتتى.