بيىل ەلوردادا جەڭىلدىكپەن بەرىلەتىن 8 مىڭنان استام پاتەر سالىنادى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

قالا اكىمى التاي كولگىنوۆ ر. قوشقاربايەۆ داڭعىلى مەن ايناكول (№23-17)، ر. قوشقاربايەۆ پەن ا 104 (جوبالىق اتاۋى) كوشەلەرىنىڭ قيىلىسىندا ورنالاسقان ءبىرقاتار الەۋمەتتىك تۇرعىن ۇيلەردىڭ قۇرىلىس بارىسىمەن تانىستى.

الەۋمەتتىك پاتەرلەردىڭ جالپى اۋدانى – 500 مىڭ شارشى مەتر. پاتەرلەر كەزەكتە تۇرعان از قامتىلعان ازاماتتار مەن تۇرعىن ءۇي قۇرىلىس جيناق بانكىنىڭ سالىمشىلارىنا ەسەپتەلگەن. ەلوردا اكىمى التاي كولگىنوۆ تۇرعىن ۇيلەردىڭ قۇرىلىسى كەزىندە «قادامدىق قولجەتىمدىلىك» قاعيداسىن ەسكەرۋ قاجەت ەكەنىن اتاپ ءوتتى. جاڭادان سالىنعان تۇرعىن ۇيلەر بارلىق جاعىنان ىڭعايلى بولۋى كەرەك.

– تۇرعىن ۇيلەردىڭ قاسىندا ادامداردىڭ تۇرمىس-تىرشىلىگىن قامتاماسىز ەتەتىن بارلىق نىساندار بولۋى كەرەك. جاڭادان سالىنعان ۇيلەردىڭ ءبىرىنشى قاباتىندا بالالارعا ارنالعان شاعىن ورتالىقتار، ەمحانا، پوليسيا پۋنكتىن، وڭالتۋ ورتالىقتارىن اشقان ءجون. بالانى مەكتەپكە نە بالاباقشاعا اپارۋ ءۇشىن قالانىڭ باسقا شەتىنە بارۋ قاجەتتىلىگى تۋىندامايدى. مەملەكەت باسشىسىنىڭ تاپسىرماسىنا سايكەس بيىل قۇرىلىس كولەمى ءۇش ەسە ۇلعايادى. ەگەر 2019 جىلى 2900 تۇرعىن پاتەر السا، بيىل 8 مىڭنان استام پاتەر بەرىلەدى، – دەدى قالا اكىمى التاي كولگىنوۆ.

سونىمەن بىرگە ەلوردادا اپاتتى جانە ەسكى ۇيلەردىڭ تۇرعىندارىن كوشىرۋ جۇمىستارى جۇرگىزىلىپ جاتىر. بيىل 5 اپاتتى ءۇيدى بۇزىپ، 200-دەن استام پاتەر تۇرعىندارىن كوشىرۋ جوسپارلانىپ وتىر. 2019 جىلى «نۇرلى جەر» باعدارلاماسى اياسىندا ەسكى 8 ءۇيدىڭ تۇرعىندارى قونىس اۋداردى. 90-نان استام وتباسى جاڭا پاتەرلەرگە كوشتى. تۇرعىنداردى كوشىرۋ جۇمىستارى 39 رازەزدە دە جۇرگىزىلدى. ۇيلەر مۇناي بازالارىنا جاقىن جەردە ورنالاستى.