بۇگىن ءماجىلىس سپيكەرى نۇرلان ءنىعماتۋليننىڭ توراعالىعىمەن پالاتانىڭ جالپى وتىرىسى ءوتتى. وندا دەپۋتاتتاردىڭ وزدەرى باستاماشى بولعان پارلامەنتتىك وپپوزيسيا تۋرالى زاڭ جوباسى ماقۇلداندى.

ءماجىلىس ءتوراعاسى اتاپ وتكەندەي، قۇجات جوباسى مەملەكەت باسشىسى قاسىم-جومارت توقايەۆتىڭ تاپسىرماسىمەن ازىرلەندى.

– وسىعان وراي، ءماجىلىس دەپۋتاتتارى باستاماشى بولعان وسى زاڭ جوباسىندا العاش رەت «پارلامەنتتىك وپپوزيسيا» دەگەن ۇعىم ەنگىزىلدى. بۇل پارلامەنت تاريحىندا بۇرىن بولماعان، ءبىراق تا، ۋاقىت تالابىنا ساي جاسالىپ وتىرعان وتە قاجەتتى قادام. سەبەبى، پارلامەنتتىك وپپوزيسيا – دەموكراتيانى ودان ءارى نىعايتۋعا، پارلامەنت جۇمىسىن دامىتۋعا، سونىمەن بىرگە، اشىق جانە ەركىن قوعامدى قامتاماسىز ەتۋگە ىقپال ەتەتىن بولادى. سوندىقتان دامىعان ەلدەردىڭ تاجىريبەسىن ەسكەرە وتىرىپ، وسى زاڭ اياسىندا، ءتيىمدى پارلامەنتتىك وپپوزيسيا قالىپتاستىرۋ كەرەك دەپ ەسەپتەيمىز، – دەدى نۇرلان نىعماتۋلين.

وسى زاڭ جوباسى بويىنشا دەپۋتاتتار ءبىرقاتار تۇزەتۋلەر ەنگىزدى. تۇزەتۋلەرگە سايكەس پارلامەنتتىك وپپوزيسيا پارلامەنت ءماجىلىسى تۇراقتى كوميتەتتەرىنىڭ حاتشىلارى لاۋازىمىنا كانديداتۋرا ۇسىنۋعا دا قۇقىلى بولادى. بۇل رەتتە، ەكى تۇراقتى كوميتەتتىڭ حاتشىلارى پارلامەنتتىك وپپوزيسيا ۇسىنعان دەپۋتاتتار اراسىنان سايلانادى.

بۇعان قوسا، قۇقىقتىق ولقىلىقتاردى بولعىزباۋ، زاڭ جوباسىنىڭ نورمالارىن بىر-بىرىنە جانە باسقا زاڭنامالىق اكتىلەرگە سايكەس كەلتىرۋ ماقساتىندا رەداكسيالىق، ناقتىلاۋشى سيپاتتاعى تۇزەتۋلەر ەنگىزىلدى.

تالقىلاۋدى قورىتىندىلاعان ءماجىلىس ءتوراعاسى وسى زاڭ جوباسى جانە ونى ءىس جۇزىندە قولدانۋ ازاماتتاردىڭ، جالپى العاندا قوعام مۇددەسى اياسىندا جەتىلدىرىلىپ وتىراتىنىن ايتتى.

زاڭ جوباسىنىڭ نەگىزگى ماقساتى – پارلامەنتتىك وپپوزيسيا ينستيتۋتىن قالىپتاستىرۋدى رەتتەۋ سالاسىندا قۇقىقتىق نەگىزدەردى قامتاماسىز ەتۋ.

ءماجىلىستىڭ باسپا ءسوز قىزمەتى