شىعىس قازاقستان وبلىسى ءشۇلبى كەنتىندە ءورت سوندىرۋشىلەر ءورت كەزىندە 21 ادام مەن ءتورت بالانى ەۆاكۋاسيالادى.، دەپ حابارلادى Polisia.kz.

ءورت تۇرعىن ۇيلەردىڭ بىرىندە بولعان. كورشىلەر 4-قاباتتاعى ءتۇتىندى بايقاپ، ءورت ءسوندىرۋ بولىمىنە حابارلاسقان. وقيعا ورنىنا ءورت سوندىرۋشىلەر ءۇش مينۋت ىشىندە كەلىپ جەتتى.

بارلاۋ كەزىندە جانىپ جاتقان پاتەردەن ءۇي يەسى ەس-تۇسسىز كۇيدە تابىلعان. زارداپ شەگۋشىنىڭ تامىر سوعىسى بولماعاندىقتان ءبىرىنشى مەديسينالىق جاردەم كورسەتىلگەن. الايدا كەلىپ جەتكەن اۋىلدىق فەلدشەر 1972 جىلى تۋعان ەر قايتىس بولعانىن انىقتادى.

وسى ۋاقىتتا ءورت سوندىرۋشىلەردىڭ ەكىنشى بۋىنى ءتۇتىن باسقان ۇيدەن تۇرعىنداردى ەۆاكۋاسيالاي باستادى. ءار پاتەردى ارالاپ، دالاعا شىعۋلارىن ءوتىندى. بارلىعى 25 ادام، ونىڭ ىشىندە 4 بالا ەۆاكۋاسيالاندى.

ەكى شارشى مەتردەگى ءورت ءسوندىرىلدى، عيماراتتى تولىق قاراپ شىعىپ، تۇرعىندارعا ءقاۋىپتىڭ جوق ەكەنىنە كوز جەتكىزگەننەن كەيىن دالاداعى تۇرعىنداردىڭ ۇيلەرىنە كىرۋلەرىنە رۇقسات بەرىلدى.

ءورتتىڭ شىعۋ سەبەبى  – وتتى ابايسىز پايدالانۋ جانە ماس كۇيدە تەمەكى شەككەن دەپ بولجانۋدا. 

جالپى وبلىس بويىنشا جىل باسىنان بەرى ءورت كەزىندە 12 ادام قۇتقارىلدى، 340 ادام ەۆاكۋاسيالاندى، 28 ادام كوز جۇمدى. پوليسيا دەپارتامەنتى تۇرعىنداردان ءورت قاۋىپسىزدىگى ەرەجەلەرىن ساقتاپ، ءورت كەزىندە دەرەۋ "101" نومىرىنە قوڭىراۋ سوعۋدى سۇرايدى.