ماڭعىستاۋدا تۇلەكتەرگە اتتەستات 3-4 ماۋسىمدا تابىستالادى. بۇل تۋرالى قوعامدىق كوممۋنيكاسيا ورتالىعىندا وتكەن بريفينگتە مو ءبىلىم باسقارماسىنىڭ باسشىسى اسقار سەيدالييەۆ مالىمدەدى.
اتتەستات تاپسىرۋ ءراسىمى 3-4 ماۋسىمدا وتكىزىلەدى. بۇل مەرەكەنىڭ ەرەكشەلىگى – سالتاناتتى تۇردە اتتەستات بەرىلەدى جانە سوڭعى قوڭىراۋ سوعىلادى. تۇلەكتەر ادەتتەگى مەكتەپ فورماسىمەن قاتىسادى. شارا مىندەتتى تۇردە مەكتەپ قابىرعاسىندا، تازا اۋدا، تەك 11 سىنىپ وقۋشىلار مەن اتا-انالاردىڭ قاتىسۋىمەن جانە بارلىق سانيتارلىق نورمالاردى ساقتاي وتىرىپ وتكىزىلەدى.
مەكتەپتەردە اتتەستات تابىستاۋ بارىسىندا كەلەسى شارالار قابىلدانادى:
- شارالاردىڭ وتكىزىلۋى ءار سىنىپ ءۇشىن 40 مينۋتتان اسپايدى جانە شارالار اراسىنداعى ينتەرۆال كەم دەگەندە 20 مينۋتتى قۇرايدى؛
- ءار ءىس-شارادان كەيىن مەكتەپتىڭ تەحنيكالىق قىزمەتكەرلەرى وتەتىن ورىندى زالالسىزداندىرادى؛
- پاراللەلدى سىنىپتاردىڭ تۇلەكتەرى مەن اتا-انالارىنىڭ تۇيىسۋىنە جول بەرىلمەيدى.
قازىرگى كەزدە مەكتەپ باسشىلىعى تاراپىنان تۇلەكتەر مەن ولاردىڭ اتا-انالارىنا مەكتەپ بىتىرۋشىلەردىڭ ءىس-شارالارىنىڭ كەستەسى، كارانتين كەزەڭىندەگى بالالار مەن اتا-انالار تاراپىنان سانيتارلىق تالاپتار ساقتالۋى تۋرالى الدىن الا حابارلانىپ جاتىر.
پىكىر قالدىرۋ