30 مامىردان باستاپ الماتى قالاسىنداعى ءدىني عيماراتتار ءوز جۇمىسىن باستايدى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

​الماتى قالاسى باس مەملەكەتتىك سانيتارلىق دارىگەرىنىڭ 2020 جىلعى 28 مامىرداعى №32 قاۋلىسىنا سايكەس، ەرتەڭنەن باستاپ سانيتارلىق-دەزينفەكسيالاۋ رەجيمىنىڭ تالاپتارىن قاتاڭ ساقتاعان جاعدايدا قالاداعى ءدىني عيماراتتار ءوز جۇمىسىن باستاي الادى.

كارانتين ۋاقىتىندا ءدىني نىسانداردىڭ جۇمىس جاساۋلارىنا قويىلاتىن باستى تالاپ: ۇجىمدىق ءىس-شارالاردىڭ وتكىزىلۋىنە شەكتەۋ قويىلۋى. اتاپ ايتساق، جۇما نامازدارى، سەنبى جانە جەكسەنبى كۇنى وتكىزىلەتىن عيباداتتار، ادامدارمەن توپتالىپ ءدىني ولەڭدەر ايتۋ سەكىلدى جانە باسقا دا ۇجىمدىق سيپاتقا يە قۇلشىلىقتاردى وتكىزۋگە رۇقسات ەتىلمەيدى. اتالعان شەكتەۋلەردىڭ باستى ماقساتى كوروناۆيرۋستىق ينفەكسيا تارالۋىنىڭ الدىن الۋ بولىپ تابىلادى.

سونىمەن قاتار، قۇلشىلىق كەزىندە ءدىني قىزمەتشىلەر مەديسينالىق ماسكا مەن قولعاپ كيۋگە جانە دە الەۋمەتتىك قاشىقتىقتى ساقتاۋعا مىندەتتى. ال، ماسكا كيمەگەن جانە رەسپيراتورلىق اۋرۋلاردىڭ كەز كەلگەن بەلگىلەرى بار (تەمپەراتۋرانىڭ كوتەرىلۋى، جوتەل، تاماقتىڭ اۋرۋى، تىنىس الۋدىڭ قيىنداۋى) ادامدار ءدىني عيماراتقا كىرگىزىلمەيدى.

ءوز كەزەگىندە، ءدىني شارالارعا قاتىسۋلارىنا رۇقسات ەتىلگەن ادامدارعا عيمارات ىشىندە 15-20 مينۋتتان ارتىق بوگەلۋلەرىنە رۇقسات ەتىلمەيدى.