اقش ميننەسوتا شتاتىندا بەيسەنبى كۇنى بەيبىت ميتينگىلەردىڭ سوڭى ءورت قويۋ، توناۋ مەن ۆانداليزمگە ۇلاستى. بۇل تۋرالى قامشى ءتىلشىسى Reuters-كە سىلتەمە جاساپ حابارلايدى.
شەرۋگە شىققاندار دجوردج فلويد ەسىمدى قارا ءناسىلدى ازاماتتىڭ ولىمىنە نارازىلىق بىلدىرگەن. بىرنەشە كۇن بۇرىن الەۋمەتتىك جەلىلەر مەن بۇقارالىق اقپارات قۇرالدارىندا اق ءناسىلدى پوليسيا قىزمەتكەرلەرى قارا ءناسىلدى ازاماتتى جەرگە جاتقىزىپ، جەلكەسىنە تىزەسىن باسىپ وتىرعان فوتولار مەن ۆيدەولار تاراپ كەتكەن. بەلگىلى بولعان اقپاراتتار بويىنشا، پوليسيا باقىلاۋىنداعى دجوردج فلويد قازا تاپقان.
گۋبەرناتور تيم ۋولز ءتارتىپ ساقتاۋعا كومەكتەسۋ ءۇشىن ۇلتتىق قورعانىس كۇشتەرىنە بۇيرىق بەرگەنىنە قاراماستان، ميننەسوتا شتاتىنىڭ ەڭ ءىرى قالاسى ميننەاپوليستەگى تارتىپسىزدىكتەر توقتاماعان.
پىكىر قالدىرۋ