ماڭعىستاۋ وبلىسىنىڭ اكىمى سەرىكباي ترۇموۆ وبلىستىق ءماسليحاتتىڭ سەسسياسىندا ءوڭىردىڭ دامۋ ستراتەگياسى مەن بيۋدجەت شىعىنىن وڭتايلاندىرۋ بويىنشا بايانداما جاسادى.

-«وبلىس بيۋدجەتىنە قاتىستى نەگىزگى مىندەتتىڭ ءبىرى قارجى-قاراجاتتى ۇنەمدەپ، ناقتى سالاعا عانا ۇلەستىرۋدى جۇيەلى تۇردە جۇرگىزۋىمىز كەرەك. ەل اۋماعىندا جاريالانعان توتەنشە جاعداي مەن كارانتين ۋاقىتىندا جوسپارلانعان بارلىق مادەني، سپورتتىق شارالار، ءىس ساپارلار، سەمينارلار، بىلىكتىلىكتى ارتتىرۋ كۋرستارى، مەملەكەتتىك تاپسىرىستاردىڭ كولەمدەرى ازايتىلدى. الداعى ۋاقىتتا دا «از شىعىن، كوپ كىرىسكە كوڭىل ءبولۋىمىز قاجەت. وڭتايلاندىرۋدى ناقتى ىسكە اسىرۋدى وزىمىزدەن باستاپ، شىعىنى كوپ قىزمەتتىك كولىك، وبلىستاعى مەرەكەلىك-مادەني شارالاردى قىسقارتۋ جانە ۇكىمەتتىڭ بالانسىنداعى عيماراتتاردى ۇقىپتى ءارى ءتيىمدى پايدالانۋ سەكىلدى ۇنەمدەۋگە بەيىمدەلۋىمىز كەرەك»، دەدى، ايماق باسشىسى. وبلىستىڭ قازىرگى بيۋدجەت كولەمى 160 ملرد.تەڭگەنى قۇراپ وتىر، ونىڭ تولىق ورىندالىسىن قامتاماسىز ەتۋ ءۇشىن ءالى دە وڭتايلاندىرۋ جۇمىستارى جالعاسادى. قالا، اۋدان اكىمدەرى مەن وبلىستىق باسقارما باسشىلارىنا دا وسىنداي مىندەت جۇكتەلگەن.
-«بۇگىنگى تاڭدا جەرگىلىكتى بيۋدجەت كىرىستەرىنىڭ 70%-عا جۋىعىن مۇناي كومپانيالارىنان تۇسەتىن تۇسىمدەر قۇرايتىندىعىن ەسكەرسەك، بۇل بىزگە مۇنايدان باسقا دا سالالاردى دامىتۋعا نازار اۋدارۋ قاجەت ەكەندىگىن اڭعارتادى. سوندىقتان ءبىز مۇناي شيكىزاتىنا تاۋەلدىلىكتى ازايتۋ باعىتىندا، نەگىزگى اكسەنتتى شيكىزاتتىق ەمەس سەكتوردى دامىتۋعا باعىتتادىق» دەدى س.ترۇموۆ. سونىمەن قاتار، جيىندا وڭىردەگى ورتا جانە شاعىن بيزنەس، دەنساۋلىق ساقتاۋ سالاسى قاتىستى وي ايتىلدى.
بۇگىندە مەديسينالىق قىزمەت ساپاسىن ارتتىرۋ باعىتىندا ارنايى جوسپار جاساقتالعان. بيىلعى جىلى اقتاۋ قالاسىنداعى ونكولوگيالىق ورتالىقتىڭ جانە جاڭاوزەن قالاسىندا 50 توسەك ورنىنا ارنالعان مەديسينالىق ورتالىعىنىڭ قۇرىلىسى اياقتالىپ، قولدانىسقا بەرىلەدى. سونىمەن قاتار، جاڭاوزەن قالاسىنداعى جاڭا جەدەل-جاردەم ستانسياسى (تۋبەركۋلەز اۋرۋحاناسى قايتا جاساقتالىپ) جانە قىزىلساي اۋىلىندا دارىگەرلىك امبۋلاتوريا قولدانىسقا بەرىلەدى. كوپتەن بەرى شەشىمى تابىلماي جۇرگەن وزەكتى ماسەلە، ول – مۇنايلى اۋدانىنداعى ورتالىق اۋرۋحانا قۇرىلىسى. اتالعان جوبانى تەزدەتۋ ءۇشىن ۇكىمەت قاراۋىنا ۇسىنىلدى. سونداي-اق، قوسىمشا جاڭا مەديسينالىق نىسانداردى سالۋعا جەكە ينۆەستورلاردى تارتۋ جۇمىستا جۇرگىزىلۋدە. مىسالى، اقتاۋ قالاسىنداعى 1 شاعىن اۋدانداعى بۇرىنعى ىشكى ىستەر قىزمەتكەرلەرىنە ارنالعان ەمحانانى جانە 37 شاعىن اۋدانداعى ەمحانا سالۋعا بەلگىلەنگەن جەرگە جەكە ينۆەستور ارقىلى جۇرگىزىلەتىن بولادى.
مامان تاپشىلىعىن شەشۋ ءۇشىن جىل سايىن گرانت بەرىلەدى. قازىرگى تاڭدا جوعارى وقۋ ورىندارىندا 522 مەديسينا مامانى وقىتىلۋدا. مامانداردىڭ بارلىعى وڭىرگە كەلىپ جۇمىس جاسايتىن بولادى.
بۇدان بولەك، قاجەت ماماندار باسقا دا وڭىرلەردەن شاقىرتىلۋدا. ولار ءۇشىن مۇنايلى اۋدانىنداعى جاتاقحانادان 30 بولمە بەرىلەدى، سونداي-اق جاڭاوزەن قالاسىندا دەنساۋلىق ساقتاۋ سالاسىنىڭ قاجەت ماماندارىنا 15 پاتەر ساتىپ الىندى. «ديپلوممەن اۋىلعا» باعدارلاماسى ىسكە قوسىلعاننان بەرى 412 مامانعا ءۇي ساتىپ الۋعا نەسيە بەرىلدى.
شاعىن جانە ورتا بيزنەس. بۇگىنگى تاڭدا وڭىردە بۇل سالا بويىنشا 53 مىڭعا جۋىق سۋبەكت جۇمىس ىستەپ، 120 مىڭنان استام ادام ەڭبەك ەتەدى.
كارانتين رەجيمى كەزىندە شاعىن جانە ورتا بيزنەس وكىلدەرىنە اۋىر سالماق تۇسكەندىگى بەلگىلى. وسىعان بايلانىستى، وبلىس بويىنشا جىل سوڭىنا دەيىن 17 مىڭعا جۋىق شاعىن جانە ورتا بيزنەس سۋبەكتىلەرى سالىقتان بوساتىلدى.
«بيزنەستىڭ جول كارتاسى-2025» بيزنەستى قولداۋ مەن دامىتۋ مەملەكەتتىك باعدارلاماسى اياسىندا 200 جوبانىڭ سىياقى مولشەرلەمەسىن سۋبسيديالاۋ ارقىلى كاسىپكەرلەردىڭ نەسيە پايىزىن ارزانداتۋ مەن 130 جوبانى كەپىلدەندىرۋ، «ەڭبەك» باعدارلاماسى اياسىندا 346 جوباعا قولداۋ كورسەتۋ جوسپارلانۋدا.