اقتوبە حروم قوسىندىلارى زاۋىتىندا جاراقات العان 32 جاستاعى جۇمىسشى 3 ماۋسىمعا قاراعان ءتۇنى قايتىس بولدى.

زاۋىتتا كۇيىك شالعان 2 جۇمىسشى اۋىر حالدە وبلىستىق جەدەل جاردەم اۋرۋحاناسىنا جەتكىزىلگەن بولاتىن. سول جەردە ءبىر اپتا ەم قابىلداعان 32 جاستاعى جۇرگىزۋشى بۇگىن كوز جۇمدى. 

– ءبىر اپتاعا جۋىق اقتوبەدەگى جەدەل جاردەم اۋرۋحاناسىنىڭ رەانيماسيا بولىمىندە بولعان جۇمىسشى اۋىر جاراقاتتان ايىعا المادى. ونىڭ دەنەسىنىڭ 60 پايىزى كۇيگەن، – دەدى اۋرۋحانانىڭ باس دارىگەرى ساكەن قاپانوۆ.

وندىرىستە جاراقات الىپ، اۋرۋحاناعا تۇسكەن تاعى ءبىر جۇمىسشى 3 ماۋسىم كۇنى رەانيماسيادان تراۆماتولوگيا بولىمىنە اۋىسقان. ناۋقاس 36 جاستا. دارىگەرلەر ونىڭ جاعدايى جاقسارا باستاعانىن ايتادى.

ايتا كەتەيىك، وقىس وقيعا 28 مامىر كۇنى ءتۇس اۋا حروم قوسىندىلارى زاۋىتىنىڭ №4 سەحىندا بولعان. زاۋىتتاعى سىيىمدىلىعى 50 تەكشە مەتر بولاتىن بوشكەنى تازارتقان 4 جۇمىسشى وقيعا ورنىندا مەرت بولدى.

اقتوبە وبلىستىق پوليسيا دەپارتامەنتىنىڭ حابارلاۋىنشا، جۇمىسشىلار ولىمىنەن سوڭ اقتوبە حروم قوسىندىلارى زاۋىتىنىڭ ءۇش قىزمەتكەرى قامالعان. "ەڭبەكتى قورعاۋ قاعيدالارىن بۇزدى" دەپ كۇدىككە ىلىنگەن ءۇش ادامنىڭ ۇستىنەن ق ر قك 156 بابىنىڭ 4ء-بولىمى بويىنشا قىلمىستىق ءىس قوزعالعان. كۇدىككە ىلىنگەندەردىڭ ءبىرى – №4 سەح باسشىسى. قالعان ەكەۋى – سەح شەبەرلەرى وقيعا بولعان كۇنى سەحتا كۇندىزگى اۋىسىمدا بولعان.