ءبىلىم جانە عىلىم ءمينيسترى اسلان ءسارىنجىپوۆتىڭ،

ءال-فارابي اتىنداعى قازۇۋ رەكتورى عالىمقايىر مۇتانوۆتىڭ نازارىنا!

14 قىركۇيەك ءال-فارابي اتىنداعى قازۇۋ-دە شەتەلدەن كەلگەن قازاق بالالارىنا ارنالعان دايىندىق فاكۋلتەتىنە قابىلداۋ ەمتيحانى ءوتتى.

قازىرگى قولدا بار مالىمەتتەرگە سۇيەنسەك، بۇل سىناققا  250-گە جۋىق تۇلەك  قاتىسقان. ولاردىڭ 30 پايىزى ياعني 80 تالاپكەر تۇركىستانداعى قوجا-احمەت ياسساۋي اتىنداعى قازاق-تۇرىك ۋنيۆەرسيتەتىنىڭ تىڭداۋشىسى اتانباق. ال قالعاندارى الماتىدا قالىپ، ءال-فارابي اتىنداعى قازۇۋ-دىڭ دايىندىق فاكۋلتەتىنە ءتۇسۋدى قالايدى.

ەستەرىڭىزگە سالا كەتسەك، قازاق دياسپوراسىنا ارنالعان دايىندىق فاكۋلتەتىندە ءبىلىم الۋعا 2000 جىلداردىڭ باسىندا جىلىنا 1500-گە جۋىق قانداسىمىز قۇجات تاپسىراتىن ەدى. سوڭعى جىلدارى بۇل كورسەتكىش كۇرت تومەندەگەن. ءتىپتى كەي جىلدارى تالاپكەرلەر سانى 200-گە دە تولماي قالدى.

بۇل جاعداي تۋرالى جوعارى وقۋ ورنىنا دەيىنگى ءبىلىم بەرۋ فاكۋلتەتىنىڭ ۇستازى جازيرا تۇمانبايقىزىنان بىلۋىمىزشە، ءال-فارابي اتىنداعى قازۇۋ-دەن ءبىلىم العىسى كەلەتىن تۇلەكتەردىڭ ورىنىن پرەزيدەنت جارلىعى بويىنشا وقۋعا كەلگەن اۋعان ستۋدەنتتەرى باسقان. ياعني سوڭعى 3 جىلدا ءقازۇۋ-دىڭ دايىندىق فاكۋلتەتىنە  بولىنەتىن 150 گرانتتىڭ باسىم بولىگىن اۋعان ستۋدەنتتەرى يەلەندى. سونىڭ سالدارىنان ەلىمىزدىڭ باس ۋنيۆەريستەتىنەن وقىعىسى كەلەتىن قانداستارىمىز الماتىدان جىراق كەتۋگە ءماجبۇر.  

–  مەن 2004 جىلدان بەرى دايىندىق فاكۋلتەتىندە باسشىلىق قىزمەتتە جۇمىس جاساپ كەلەمىن. قازۇۋ-گە شەتەلدەن كەلگەن ستۋدەنتتەردى دايىنداۋعا 150 گرانت بولىنەدى. سوڭعى جىلدارى بۇل گرانتتاردىڭ كوپ بولىگىن اۋعانستاننان كەلگەن تىڭداۋشىلار يەلەنۋدە. پرەزيدەنت جارلىعى بويىنشا ولار بىزدە وقۋعا مىندەتتى. دەگەنمەن  قازاق دياسپوراسىنا بولىنەتىن 150 گرانت اۋعان ستۋدەنتتەرىنەن بولەك قاراستىرىلسا ءجون بولار ەدى، - دەيدى جازيرا تۇمناباي قىزى مولداعالييەۆا.

بيىل بۇل فاكۋلتەتتەن وقۋعا اۋعانستاننان كەلگەن 174 تۇلەك ءوتىنىش بىلدىرگەن. ءبىلىم جانە عىلىم مينيسترلىگى قاراستىرىپ وتىعان 150 گرانت ولاردىڭ وزىنە دە ازدىق ەتىپ وتىر. ال ءدال وسى ورىنعا قۇجات تاپسىرىپ وتىرعان 150-گە جۋىق قازاق بالاسىن قايدا اپارامىز؟ ولاردىڭ ىشىندە شەتەلدىڭ، مىسالى، جۇڭگو ەلىنىڭ بىلدەي ۋنيۆەرسيتەتتەرىن تارك ەتىپ كەلىپ وتىرعان قانشاما تالانتتى بالالار بار.

ەمتيحان تاپسىرۋعا كەلگەن باۋىرلارىمىزدان سۇراپ بىلگەنىمىزدە، بىرەۋى قىتايدىڭ ماڭداي الدى پەكين ۋنيۆەريستەتىنەن باس تارتىپ، "ال-فارابيدەن" وقۋدى ماقسات ەتىپ كەلگەن، بىرەۋى الماتىدان باسقا قالادا ەشقانداي تۋىس-تۋعانى جوق. بۇل دەگەن ءسوز وقۋعا تالاپتانىپ كەلگەن جاس قازاقتاردىڭ كوپ ساندىسى الماتىدا قالىپ، ءبىلىم العىسى كەلەدى. بىلايشا كوپ تە ادام ەمەس. 150 تۇلەككە ءبىر جىلدىق وقۋ گرانتىن بەرۋ اسا قيىندىق تۋدىرماسا كەرەك.

ال ولار  كەلەر جىلى قانداي قالادا، قانداي ۋنيۆەرسيتەتتە وقىعىسى كەلەدى. ونى ءوزى، ءوزىنىڭ ءبىلىمى شەشەدى. قازىرە ءبىر جىلدىق وقىتۋ ماسەلەسىن كۇردەلىلەندىرمەي ءبىلىم جانە عىلىم ءمينيسترىلى وڭتايلى شەشىم قابىلداعانى ءجون.

ءبىلال قۋانىش