كوروناۆيرۋس جۇقتىرعان پرەزيدەنتتىڭ باسپا ءسوز حاتشىسى بەرىك ءۋالي دەنساۋلىعى تۋرالى ايتتى، جازادى Qamshy.kz اقپارات اگەنتتىگى Tengrinews.kz سايتىنىڭ دەرەگىن نەگىزگە الىپ. 

– مەندە سيمپتومدار كوروناۆيرۋس انىقتالعاننان كەيىن بايقالا باستادى. دەنە قىزۋىم جوعارىلاپ، تاماعىپ قىشىپ، بۇكىل دەنەم سىنىپ تۇرعانداي بولدى. دەنە قىزۋىمەن ون كۇندەي تۇسپەي قويدى، كەي كۇنى 39 گرادۋسقا جەتتى. تابەتىم دە بولمادى. دارىگەرلەر تەكسەرگەن كەزدە پنيەۆمونيا دەگەن دياگنوز قويدى، حاتتاما بويىنشا ەم جازىپ بەردى. كەشەدەن باستاپ قانا ءوزىمدى جاقسى سەزىنە باستادىم. دەنە قىزۋىم ءتۇسىپ، تىنىس الۋىم دا جاقساردى.

مەنى ەمدەپ شىققان بارلىق دارىگەرگە جانە مەديسينالىق قىزمەتكەرگە العىس ايتامىن. ول كاسىبيلىگىنىڭ ارقاسىندا جاعدايىم جاقساردى، – دەدى بەرىك ءۋالي. 

ول بارلىق قازاقستاندىقتى ءوز دەنساۋلىعى مەن جاقىندارىنىڭ دەنساۋلىعى ءۇشىن كارانتين ەرەجەلەرىن قاتاڭ ساقتاۋعا شاقىردى.

– الەۋمەتتىك قاشىقتىقتى ساقتاۋ كەرەك، سانيتار دارىگەرلەردىڭ ايتقاندارىن ورىنداۋ قاجەت. ماسكا تاعىپ، قولعاپ كيۋ وتە ماڭىزدى، سونداي-اق قولدى ۇنەمى دەزينفەكسيالاۋ كەرەك.

وكىنىشكە قاراي، مەنىڭ ەگدە جاستاعى اتا-انامنان دا كوروناۆيرۋس انىقتالدى. باستاپقىدا سولاردىڭ دەنساۋلىعى ءۇشىن قاتتى الاڭدادىم. قازىرگى ۋاقىتتا ولارعا مەديسينالىق كومەك كورسەتىلىپ جاتىر. ءبىزدىڭ دارىگەرلەر مەن مەدبيكەلەرگە تاعى دا العىس ايتامىن. ءقازىر اتا-انامنىڭ جاعدايى قاناعاتتانارلىق. تاياۋدا جازىلىپ كەتەدى دەگەن سەنىمدەمىن، – دەدى باسپا ءسوز حاتشى.

ەسكە سالايىق، بەرىك ءۋاليدىڭ كوروناۆيرۋس جۇقتىرعانى تۋرالى 6 ماۋسىمدا حابارلانعان بولاتىن.