الماتىدا سوڭعى ەكى اپتادا كوروناۆيرۋس جۇقتىرعاندار ەكى ەسەگە كوبەيىپ، ينفەكسيالىق ستاسيونارلاردىڭ 95 پايىزى تولىپ تۇر. بۇل تۋرالى بۇگىن وتكەن بريفينگ كەزىندە قالانىڭ باس سانيتار دارىگەرى جانداربەك بەكشين ايتتى.
"ءقازىر قالادا كوروناۆيرۋس ينفەكسياسىنا بايلانىستى احۋال كۇردەلەنىپ كەتتى. ىندەت جۇقتىرعانداردىڭ سانى كۇرت ءوسىپ بارادى. سوڭعى ەكى اپتادا ياعني، 3 ماۋسىمنان باستاپ قالادا كوروناۆيرۋس ينفەكسياسىن جۇقتىرعاندار ەكى ەسەگە كوبەيدى. ينفەكسيالىق ستاسيونارداعى ورىنداردىڭ 95 پايىزى بوس ەمەس. ءقازىر اۋرۋحانادا جازىلعانداردىڭ ورنىنا جاڭا ناۋقاستار كەلىپ جاتىر" دەدى بەكشين.
ونىڭ سوزىنشە، الماتىدا دەمالىس كۇندەرى ءىرى ساۋدا ورىندارى مەن بازارلار جابىلادى، ءبىراق بلوكبەكەتتەر قايتا قويىلمايدى.
"كوروناۆيرۋس ينفەكسياسىنىڭ تارالۋىنا جول بەرمەۋ ماقساتىندا وسى سەنبى-جەكسەنبى كۇندەرى قالاداعى ءىرى ساۋدا ورىندارى مەن بازارلار جابىلادى. ءبىراق بلوكبەكەتتەر قايتا قويىلمايدى، قالا جابىلمايدى. قارجى ورتالىقتارى، بانكتەر جانە حالىققا قىزمەت كورسەتۋ ورتالىقتارىنىڭ جۇمىسى توقتامايدى. سىرتقى پەريمەتردە ەشقانداي بەكەت جوق. سوندىقتان قالا تۇرعىندارى جانە وبلىس تۇرعىندارىنا قالاعا كىرۋگە جانە شىعۋعا ەشقانداي كەدەرگى جوق " دەدى قالانىڭ باس سانيتارى.
پىكىر قالدىرۋ