مەديسينا قىزمەتكەرلەرى كۇنىنە وراي «Qazaqstan» تەلەراديوكورپوراسياسى تاڭعى 09:00-دەن تىكەلەي ەفيردە «ابزال جاندار» تەلەمارافونىن وتكىزىپ جاتىر.

تەلەمارافوننىڭ ماقساتى – ۇلت ساۋلىعى مەن ءار ادامنىڭ ءومىرى ءۇشىن كۇرەسىپ جۇرگەن مەديسينا قىزمەتكەرلەرىنىڭ ەرەن ەڭبەگى مەن ەرلىگىن دارىپتەۋ.

قوسىلىمداردا مەديسينا سالاسىنىڭ ارداگەرلەرى مەن ءدال ءقازىر دەمالىسسىز، ءۇي بەتىن كورمەي، قىزمەت ەتىپ جۇرگەن دارىگەرلەرمەن سۇحبات جۇرگىزىلىپ، ەل مەديسيناسىنىڭ ديناميكالىق دامۋ جولى تالقىلانادى.

«Qazaqstan» ۇلتتىق ارناسىنىڭ تىلشىلەرى ەلىمىزدىڭ بارلىق وڭىرىنەن تىكەلەي بايلانىسقا شىعىپ، ايماقتارداعى مەديسينالىق نىسانداردىڭ تىنىس-تىرشىلىگىن كورسەتەدى.

مەديسينا سالاسىنىڭ مەترلەرى ستۋديادا جانە Skype-بايلانىس ارقىلى كارديوحيرۋرگيا، نەيروحيرۋرگيا، ترانسپلانتاسيا باعىتتارىنداعى سوڭعى جاڭالىقتاردى باياندايدى. كورەرمەن توتەنشە جاعداي كەزەڭىندە سالىنعان اۋرۋحانالار مەن ونداعى ناۋقاستاردىڭ حال-احۋالىن بىلە الادى.

بۇعان دەيىن حابارلانعانىمىزداي، كوپشىلىكتىڭ الەۋمەتتىك جەلىلەر مەن ەلەكتروندى پوشتا، Whatsapp ارقىلى جولداعان ەرەكشە وقيعالارى تىكەلەي ەفيردە باياندالىپ، حات يەلەرى اتاپ كورسەتكەن دارىگەرلەگە قۇرمەت كورسەتىلەدى.

ەفير بارىسىندا 8 (7172) 75 71 71 نومىرىنە حابارلاسىپ، ابزال جاندارعا العىس ءبىلدىرىپ، ءتول مەرەكەسىمەن قۇتتىقتاۋعا ءاربىر ادامنىڭ مۇمكىندىگى بار.