دەنساۋلىق ساقتاۋ ءمينيسترى الەكسەي سوي پرەزيدەنتتىڭ اتىنا جولداعان ۆيدەوسى الەۋمەتتىك جەلىدە ءبىرشاما رەزونانس تۋدىرعان شىمكەنتتىك رەابيليتولوگ اينا باكەيەۆامەن سويلەسكەنىن ايتتى، دەپ حابارلادى قازاقپارات.

– ەم-دومنىڭ كۇردەلى ءادىسى بويىنشا ءوتىنىم جاساعان دارىگەر اينا باكەيەۆانىڭ حابارلاماسىنا قاتىستى ءبىرشاما سۇراق كەلىپ ءتۇستى. بۇگىن ونىمەن بايلانىسقا شىعىپ، 40 مينۋتتاي سويلەستىم. نەگىزگى پروبلەمانى، دارىگەردىڭ نەنى جەتكىزگىسى كەلگەنىن ءتۇسىندىم. ول الەۋمەتتىك جەلىلەردە، ءتىپتى مەديسينا قىزمەتكەرلەرىنىڭ ايتۋى بويىنشا دا ەم-دومنىڭ ءتۇر-تۇرى تاراپ كەتكەنىنە الاڭداۋشىلىق ءبىلدىرىپ جاتىر. ەم-دوم تۇرلەرىن الەۋمەتتىك جەلىلەردە كورىپ العان ادامداردىڭ دا ويى سان-ساققا كەتەدى. ال كەيبىر پرەپاراتتار كەرىسىنشە، دەنساۋلىقتى ناشارلاتادى. سۇراقتارعا جاۋاپ تاپقىسى كەلەتىن مىڭداعان ادام اينا باكەيەۆاعا جۇگىنەدى ەكەن، – دەدى الەكسەي سوي بۇگىن وكق-دا وتكەن باسپا ءسوز ءماسليحاتىندا.

وسى ورايدا ول دەنساۋلىق ساقتاۋ مينيسترلىگى حالىققا ارنالعان كەڭەستەردى رەسمي بەكىتكەنىن ءمالىم ەتتى.

– ءقازىر دەنساۋلىق ساقتاۋ مينيسترلىگى ماماندارمەن بەكىتىلگەن ناقتى رەسمي كەڭەستەردى ازىرلەدى. ول دەنساۋلىق ساقتاۋ مينيسترلىگىنىڭ سايتىنا جاريالانادى. الەۋمەتتىك جەلىلەر ارقىلى دا حالىققا جەتكىزىلەدى. ول دا (دارىگەر اينا باكەيەۆا) ەم-دوم حاتتاماسىن ءوز رەسۋرستارى ارقىلى ازاماتتارعا جەتكىزەتىنىن ايتتى، – دەدى مينيستر.

بۇعان دەيىن اينا باكەيەۆا كۆي ناۋقاستارىن ەمدەۋگە قاتىستى سىن ايتىپ، الەۋمەتتىك جەلىلەرگە ۆيدەو جاريالاعان بولاتىن.