قازاقستان دەنساۋلىق ساقتاۋ مينيسترلىگىنىڭ 8 شىلدەدەگى دەرەگى بويىنشا، سوڭعى تاۋلىكتە ەلدە 1962 ادامنان كوروناۆيرۋس تابىلدى. ەلدە بۇعان دەيىن ءبىر كۇندە ءدال مۇنشا ادامنان COVID-19 انىقتالماعان.
سوڭعى تاۋلىكتە 658 تۇرعىنىنان كوروناۆيرۋس تابىلعان اتىراۋ وبلىسى ۆيرۋس جۇقتىرعاندار سانى بويىنشا وڭىرلەر اراسىندا كوش باستادى. بۇل وبلىستا ىندەتكە شالدىققاندار سانى 6814-كە جەتتى.
سوڭعى رەسمي اقپاراتقا ساي، قازاقستاندا كوروناۆيرۋس جۇقتىرعاندار سانى – 53021. وسى ۋاقىتقا دەيىن ولاردىڭ 35137ء-ى اۋرۋىنان ايىعىپ، 264ء-ى كوز جۇمدى.
دەنساۋلىق ساقتاۋ مينيسترلىگى سوڭعى ەكى تاۋلىكتە ولگەندەر تۋرالى مالىمەت تاراتقان جوق.
قازاقستان ۆيرۋس جۇقتىرعاندار سانى بويىنشا الەم ەلدەرىنىڭ اراسىندا 32-ورىندا تۇر.
پىكىر قالدىرۋ