پرەزيدەنت قاسىم-جومارات توقايەۆتىڭ قاتىسۋىمەن ۇكىمەتتىڭ كەڭەيتىلگەن وتىرىسى باستالدى. بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي حابارلادى. ۆيدەوبايلانىس رەجيمىندە ءوتىپ جاتقان وتىرىس تىكەلەي ەفيردەن كورسەتىلىپ جاتقان جوق.
"ق ر پرەزيدەنتى ق.توقايەۆ: "بۇگىن ءبىز كوروناۆيرۋس ىندەتىنە قارسى قابىلدانىپ جاتقان شارالارعا قاتىستى ماسەلەلەردى قارايمىز. سونىمەن قاتار، بيىلعى ءبىرىنشى جارتىجىلدىقتاعى ەلىمىزدىڭ الەۋمەتتىك-ەكونوميكالىق دامۋىن قورىتىندىلايمىز.
جىل باسىنان بەرى ۇلتتىق ەكونوميكا كۇردەلى جاعدايدا دامىپ كەلەدى. ەل ەكونوميكاسى جالپى 1،8 پايىزعا تومەندەدى. پاندەمياعا بايلانىستى قىزمەت كورسەتۋ سالاسى ايتارلىقتاي قۇلدىرادى (5،6 پايىز). حالىقتى جانە بيزنەستى قولداۋ ءۇشىن اسا ماڭىزدى شارالار قابىلدادىق. مەنىڭ تاپسىرمام بويىنشا ەكونوميكالىق ءوسىمدى قايتا قالپىنا كەلتىرۋ جونىندە كەشەندى جوسپار قابىلداندى.
بۇگىن ۇكىمەت پەن اكىمدەردىڭ ەكونوميكالىق ءوسىمدى قالپىنا كەلتىرۋ جانە حالىقتىڭ ءال-اۋقاتىن قامتاماسىز ەتۋ جونىندە قابىلداعان شارالارىن تالقىلايمىز.
بۇگىنگى جيىننىڭ جۇمىسىن مىناداي تارتىپپەن جۇرگىزۋدى ۇسىنامىن:
ەلىمىزدىڭ الەۋمەتتىك-ەكونوميكالىق دامۋىنىڭ قورىتىندىلارى مەن جىل سوڭىنا دەيىن ورىندايتىن مىندەتتەر جونىندە پرەمەر-مينيستر اسقار ۇزاقباي ۇلى مامين بايانداما جاسايدى.
اقشا-نەسيە ساياساتىنا قاتىستى شارالار تۋرالى ۇلتتىق بانكتىڭ ءتوراعاسى ەربولات اسقاربەك ۇلى دوسايەۆ باياندايدى.
ەلىمىزدەگى ەپيدەميولوگيالىق احۋالدى جاقسارتۋ جونىندەگى شارالار تۋرالى دەنساۋلىق ساقتاۋ ءمينيسترى الەكسەي ۆلاديميروۆيچ سوي باياندايدى.
سوسىن ءبىرقاتار وبلىستىڭ باسشىلارىنا ءسوز بەرەمىن.
قاجەت بولسا، باسقالارعا دا ءسوز بەرىلەدى.
قىسقا ءارى نۇسقا، نەگىزگى ماسەلەلەرگە توقتالىڭىزدار."
مەملەكەت باسشىسى قاسىم-جومارات توقايەۆتىڭ ۇكىمەتتىڭ كەڭەيتىلگەن وتىرىسىندا سويلەگەن كىرىسپە سوزىنەن" دەلىنگەن بەرىك ءۋاليدىڭ facebook-تەگى جازباسىندا.
پىكىر قالدىرۋ