قازاقستان ازاماتتىق اۆياسياسىنىڭ ەكى بورتى ماسكەۋدەن 55 توننا مەديسينالىق دارى-دارمەك جەتكىزدى. وندا كوروناۆيرۋس ينفەكسياسى مەن پنيەۆمونيانى ەمدەۋگە ارنالعان، ۆيرۋسقا قارسى جانە دەنە قىزۋىن تۇسىرەتىن پرەپاراتتار، انتيكواگۋليانتتار مەن انتيبيوتيك بار. بۇل تۋرالى دەنساۋلىق ساقتاۋ مينيسترلىگىنىڭ باسپا ءسوز قىزمەتى حابارلادى.
اكەلىنگەن دارى-دارمەك ىشىندە 150 مىڭعا جۋىق ازيتروميسين تابلەتكاسى، ميلليونعا جۋىق سەفترياكسون، تاميفليۋ پرەپاراتىنىڭ 150 مىڭ پاكەتى، اربيدولدىڭ 50 مىڭ وراماسى بار.
مينيسترلىك بۇل قور ءبىر ايعا جەتەدى دەپ وتىر. كەلگەن فارمونىمدەر "ءدارىحانالارعا بىركەلكى ۇلەستىرىلىپ، جاقىن كۇندەرى وڭىرلەرگە جەدەل جەتكىزىلەدى" دەيدى ۆەدومستۆوداعىلار.
"وسى بورت كەلەسى اپتادا ءۇندىستاننان دا دارى-دارمەك تاسىمالدايدى. دارى-دارمەكپەن قامتاماسىز ەتۋدىڭ قولجەتىمدىلىگىن ارتتىرۋ جانە دارى-دارمەككە بارلىق قاجەتتىلىكتى جابۋ ماقساتىندا مۇنداي ءىس-شارالار اي سايىن ۇيىمداستىرىلاتىن بولادى.
دارى-دارمەكتى ازاماتتىق اۆياسيا كوميتەتىنىڭ ارنايى بورتتارىمەن جەدەل جەتكىزۋ – نارىقتى جوعارى سۇرانىسقا يە دارى-دارمەكپەن جەدەل قامتاماسىز ەتۋ ءۇشىن ۇكىمەت ازىرلەگەن شارالاردىڭ ءبىرى. مۇنداي رەيستەر قازاقستانداعى ءدارىحانا جەلىلەرىن تۇراقتى تۇردە دارى-دارمەكپەن تولىقتىرىپ وتىرادى" دەلىنگەن مينيسترلىك تاراتقان اقپاراتتىق حابارلامادا.
پىكىر قالدىرۋ