ەرجان قىپشاقبايەۆ – قىزىلوردا وبلىسى ارال قالاسىنىڭ تۋماسى. جاسى 25-تە. وسى ۋاقىتقا دەيىن ءار جۇمىستىڭ باسىن شالعان ول ءقازىر الماتىدا "Glovo" جەتكىزۋ سەرۆيسىنىڭ سەرىكتەسى، ياعني كۋرەر بولىپ جۇمىس ىستەيدى.
ەرجان 9-سىنىپتى بىتىرگەن سوڭ اقتوبە قالاسىنا وقۋعا ءتۇستى. ءتورت جىل كوللەدجدە وقىدى. ونى ءتامامداعان سوڭ الماتىداعى قازاق باس ساۋلەت-قۇرىلىس اكادەمياسىنىڭ ستۋدەنتى اتاندى. الايدا قىزىعۋشىلىعى بولماي، وقۋدى ورتا جولدان تاستاپ كەتكەن.
وقۋدان شىعىپ قالعان ەرجان كەزدەسكەن كەز كەلگەن جۇمىستى ىستەگەن. ءوزىنىڭ سوزىنشە، جۇمىس تالعامايدى.
ەرجان الەۋمەتتىك جەلىدە وتە بەلسەندى. ءوزىنىڭ جۇمىسى مەن قىزىقتى ساتتەرىن ۇزدىكسىز Instagram پاراقشاسىنا سالىپ وتىرادى. كۋرەر قىزمەتىنىڭ قانشالىقتى قىزىقتى ەكەنىن بارلىعى بىلگەنىن قالايدى.
– ءقازىر مەندە ەكى پاراقشا بار. بىرىنشىسىنە ماعىنالى ۆيدەولاردى، تاربيەلىك ءمانى بار دۇنيەلەردى جۇكتەپ وتىرامىن. ەكىنشىسى ءوزىمنىڭ جەكە پاراقشام. ول جەردە جۇمىس تۋرالى جازام. نەگە ەكەنىن كوپ ادام ءوزىنىڭ كۋرەر بولىپ جۇمىس ىستەيتىنىن اشىپ ايتا بەرمەيدى. مەن "ەگەر قانداي دا ءبىر جۇمىسقا كىرەتىن بولسام، Instagram جەلىسىندە سول تۋرالى ايتىپ وتىرامىن" دەپ بۇرىننان ويلاپ ءجۇرتىنمىن. الەۋمەتتىك جەلىدە جۇمىسىن كورسەتە وتىرىپ تانىمال بولىپ كەتكەن قاساپشىلار بار. مەن دە سول سەكىلدى وزىمە قىزىق دۇنيەنى جەلىدەگى پاراقشامدا ءبولىسىپ وتىرامىن. كۋرەردىڭ جۇمىسى قىزىقتى ەكەنىن باسقالار دا بىلسە دەيمىن. قىستا تاپسىرىستى جاياۋ ورىندايتىنمىن. تاماقتى سۋىتىپ الماۋ ءۇشىن تەزىرەك جۇرۋگە تۋرا كەلەدى. جۇمىس بارىسىندا كوپتەگەن تانىمال ادامدارمەن جولىعامىز. بىردە ساكەن مايعازييەۆ اعامىزبەن كورىسىپ قالدىم. ول كىسى سونداي قاراپايىم ەكەن. ەكەۋىمىز ءبىراز اڭگىمەلەستىك. مەن قانداي دا ءبىر بەلگىلى ادامدى كورسەم، بىردەن سويلەسىپ كورەمىن. ماعان اداممەن ارالاسقان ۇنايدى. بۇل ارەكەتىم ءۇشىن ۇيالمايمىن، – دەيدى ول.
ەرجاننىڭ سوزىنشە، كارانتين كەزىندە، ەلدىڭ ءبارى ۇيدە وتىرعاندا جەتكىزۋشىلەردىڭ جۇمىسى قىزا تۇسكەن.
ەرجان ارالدا جۇرگەندە قايىرىمدىلىقپەن اينالىسىپ، مۇقتاج جاندارعا قول ۇشىن سوزعان.
پىكىر قالدىرۋ