الماتى وبلىسى جامبىل اۋدانىنداعى جەكەمەنشىك بالاباقشا اشقان كاسىپكەرلەر اۋداندىق ورتالىق اۋرۋحاناعا كومەك رەتىندە 20 توسەك ساتىپ الىپ بەردى. يگى باستاماعا قاتىسقان جومارت جاندار الداعى ۋاقىتتا ساۋاپتى ءىستىڭ تاعى دا جالعاستىراتىنىن ايتتى.
جامبىل اۋدانىندا جەكەمەنشىك بالاباقشا اشقان كاسىپ يەلەرى جۇمىستارىنىڭ ۋاقىتشا توقتاپ تۇرعانىنا قاراماستان، اۋداندىق ورتالىق اۋرۋحاناعا توسەك الىپ بەرۋدى ۇيعارىپتى. جۋىردا جەكەمەنشىك بالاباقشالاردىڭ ءبىر توپ قۇرىلتايشىسى اۋداندىق ورتالىق اۋرۋحاناعا العاشقى جيىرما توسەكتى جەتكىزدى. بۇل – ءدال قازىرگى قيىن جاعدايدا سىرقاتتانعانداردى اياققا تۇرعىزۋ ءۇشىن اسا قاجەت دۇنيەنىڭ ءبىرى. قارعالى اۋىلىنداعى «ايىم» بالاباقشاسىنىڭ قۇرىلتايشىسى بانۋ يسايەۆا وسى باستاماعا اتسالىسقان ارىپتەس كاسىپكەرلەردىڭ نيەتىن قوسا جەتكىزدى.
– بۇگىنگىدەي قيىن-قىستاۋ كەزەڭدە جەكەمەنشىك بالاباقشا يەلەرىنىڭ ۇيىمداسۋىمەن اۋدانىمىزدىڭ ورتالىق اۋرۋحاناسىنا تولىقتاي جابدىقتارىمەن جيىرما توسەك سىيلادىق. ءبىز حالىقپەن ءارقاشان بىرگەمىز. اۋىرماڭىزدار. ىندەتتەن ساقتانايىق. وسى قيىنشىلىقتان ءبارىمىز بىرلەسە، بىر-بىرىمىزگە كومەك قولىمىزدى سوزا وتىرىپ تەزىرەك ارىلايىق، – دەدى ول.
كومەكتى قابىلداپ العان مەديسينا مەكەمەسىنىڭ قىزمەتكەرلەرى دە كاسىپكەرلەرگە شىنايى العىستارىن ءبىلدىرىپ، ىندەتپەن كۇرەستە جەڭىسكە جەتەتىندەرىنە سەندىردى. وسى ورايدا جۇقپالى اۋرۋلار بولىمشەسىنىڭ دارىگەرى مايرا قۇدياروۆا مەن اۋداندىق ورتالىق اۋرۋحانا ديرەكتورىنىڭ ادىستەمەلىك-ۇيىمداستىرۋ ءىسى جونىندەگى ورىنباسارى ناتاليا كراۆچەنكو: «ەلىمىزدە وسىنداي قيىن-قىستاۋ جاعداي بولىپ جاتقاندا ءبىر جاعىمىزعا دەمەۋ بولعان جەكەمەنشىك بالاباقشالاردىڭ يەلەرىنە راحمەت ايتامىز. بۇعان ەمدەلۋشىلەرىمىز دە ريزا بولادى دەگەن ويدامىز. بۇل قيىندىقتى لايىقتى ەڭسەرىپ، ابىرويمەن جەڭىپ شىعامىز»، – دەگەن ريزاشىلىق پەيىلدەرىن ءبىلدىردى.
ايدار قالييەۆ
الماتى وبلىسى
پىكىر قالدىرۋ