"اسىل ارنا" تەلەارناسىنىڭ باس ديرەكتورى، ايتىسكەر اقىن مۇحامەدجان تازابەك الەۋمەتتىك جەلىدەگى پاراقشاسىندا ايسۇلتان راحاتپەن مەككەدە بىرگە بولعانىن جازىپ، جاقىندارىنا كوڭىل ايتتى.
"ونشاقتى جىل بۇرىن ايسۇلتانمەن بىرگە قاسيەتتى مەككەدە بىرگە بولىپ، ۋمرا قاجىلىعىن اتقارعان ەدىك. ەكى-ۇش كۇننىڭ ىشىندە قاتتى اسەرلەنىپ، جانى نۇرلانىپ، كوپ جاقسى سوزدەر ايتقان ەدى.
اسىرەسە، قايتار جولدا، ەلگە جەتكەنشە ۇشاق ىشىندەگى ءۇش-تورت ساعاتتىق اڭگىمە ءالى ەسىمدە.
"اعا، قازىرگى جاستاردى بىلمەيسىز عوي، قاتتى وزگەرىپ كەتتى. رۋحاني قۇندىلىق دەگەندەر اياق استى بولىپ، جاستار تەك قانا ءبىر كۇندىك راحاتىن عانا ويلايدى. ولار ءارتۇرلى ويىنداردىڭ قىزىعىنا كىرگەنى سونداي، دارەتحانانىڭ ىشىنە سۋسىنى مەن تاماعىن الا كىرىپ، قاجەتتىلىك وتەيتىن جەردىڭ قاياۋىندا ساعاتتاپ وتىرادى" دەگەنىن ەستىپ، جۇرەگىم اۋىرعان ەدى.
"بولدى، ەلگە جەتكەسىن ءوزىم دە بۇتىندەي وزگەرەم، دوستارىمدى دا يماندىلىققا، ىزگىلىككە تارتام" دەپ، شابىتتانىپ، ەرەكشە ەسەيىپ ورالعان ەدى...
وكىنىشتى...
تاۋبەگە بۇتىندەي كەلەتىن، اللانىڭ سۇيىكتى ق ۇلى اتانىپ، "تولىق ادام" بەينەسىندە وزىنە دە، وتباسى، ورتاسىنا دا جاقسىلىعىن جاياتىن جاسىندا جامان ورتانىڭ كەساپاتىنان ارقانىن ۇزە الماي، قىرشىنىنان قيىلدى.
ۇلى ساپاردا بىرگە بولعان باۋىرىمىز ەدى، اقىرەتىن ۇلى راببىمىزدىڭ ادىلدىگىنە تاپسىرامىز.
جوقتاۋشىلارى مەن جاناشىرلارىنا كوركەم سابىر بەرسىن!" دەلىنگەن جازبادا.
بۇگىن قازاقستان ەكس-پرەزيدەنتىنىڭ جيەنى ايسۇلتان راحاتتىڭ قايتىس بولعانى حابارلاندى.
پىكىر قالدىرۋ