دەموكراتيالىق پارتيا قۇرۋ بويىنشا باستاماشىل توپ جەتەكشىسى، قوعام بەلسەندىسى جانبولات ماماي ەكس-پرەزيدەنت نۇرسۇلتان نازاربايەۆتىڭ جيەنى ايسۇلتان نازاربايەۆتىڭ ولىمىنە كۇمانمەن قارايتىنىن جەتكىزدى.

"سوڭعى ءبىر جىلدىڭ ىشىندە ايسۇلتانعا قاتىستى داۋ-داماي تولاستاعان ەمەس. ءارتۇرلى ماسەلەلەر كوتەرىلدى، كوپتەگەن شىندىقتىڭ بەتىن اشتى. ءوزىنىڭ وتباسىنىڭ ىشىندەگى، جالپى ەلدەگى ماسەلەلەرگە، وليگارحقا بايلانىستى شىندىقتىڭ بەتىن اشتى.

ەندى مەنىڭ ءوز باسىم 30-عا ءالى كەلمەگەن، وردا بۇزاتىن، تەپسە تەمىر ۇزەتىن جىگىتتىڭ اياق استىنان وسىلاي كەتىپ قالعانىنا كۇماندانامىن. ءوزى كەتىپ قالعانىنا! ەندى ءارتۇرلى جاعدايدا ايتۋعا بولادى، بۇل جەردە بولجام جاساۋ وتە قيىن. ويتكەنى ول قازاقستاندا ەمەس لوندوندا قايتىس بولعان. ءبىراق ءوز باسىم كۇماندى نارسەلەر كوپ دەپ سانايمىن. ءبىراق بۇل جەردە ءبىر نارسەنى ايتقىم كەلەدى. مىنا نازاربايەۆتاردىڭ وتباسى تەك قانا وزدەرىنىڭ وتباسىنىڭ عانا ەمەس، ەڭ وكىنىشتىسى، بۇكىل قازاقستاننىڭ ويرانىن شىعاردى دەپ ايتۋعا بولادى. بۇكىل قازاقستاندى ويراندادى!" دەپ ايتىلعان بەلسەندىنىڭ الەۋمەتتىك جەلىدەگى ۆيدەوۇندەۋىندە.

♦ "مەنى ولتىرۋگە تىرىسۋى مۇمكىن". ايسۇلتان ءومىرى ءۇشىن قاۋىپتەنگەن

ونىڭ بۇل جازباسىنا وقىرمانداردىڭ پىكىرى ەكىگە ءبولىندى. ءبىرى  "وتە دۇرىس ايتادى. شىندىق" دەپ قولداۋ بىلدىرسە، كەيبىر وقىرماندار "جوق، جانبولات مىرزا، وسى جولى سىزبەن كەلىسپەيمىن. اجال ايتىپ كەلمەيدى" دەپ قارسى پىكىر بىلدىرگەن.

بۇگىن قازاقستان ەكس-پرەزيدەنتىنىڭ جيەنى ايسۇلتان راحاتتىڭ قايتىس بولعانى حابارلاندى.