تالدىقورعان قالاسىنىڭ اكىمى عالىمجان ءابدىرايىموۆ كارانتين ۋاقىتىندا قايىرىمدىلىق كورسەتىپ، يگى شارالارعا اتسالىسقان كاسىپكەرلەردى ماراپاتتادى.

العىس حاتپەن ماراپاتتالعانداردىڭ قاتارىندا جەكە كاسىپكەر دينارا تايجانوۆاعا «انا جۇرەگى»، ەرجان بارىسوۆقا «وتان پاتريوتى» مەدالى تابىستالدى.

«الەمدى دۇرلىكتىرگەن كوروناۆيرۋس ىندەتى ەلىمىزدى دە اينالىپ وتپەدى. الايدا مەملەكەت باسشىسى قاسىم-جومارت توقايەۆتىڭ دەر كەزىندە تاپسىرما بەرىپ، الماتى وبلىسىنىڭ اكىمى اماندىق عابباس ۇلىنىڭ قولداۋىنىڭ ارقاسىندا ىندەتتىڭ الدىن الۋ مەن بولدىرماۋعا قاتىستى ءتيىستى ءىس-شارالار اتقارىلۋدا. «جۇمىلا كوتەرگەن جۇك جەڭىل» دەمەكشى، قيىن ساتتە جانى جايساڭ ازاماتتارىمىز جانىمىزدان تابىلىپ، قايىرىمدىلىق كومەكتەرىن ۇسىنعانى قۇپتارلىق ءىس بولدى. جومارت جانداردىڭ قاراپايىم بولىپ كەلەتىندىگى بەلگىلى، كەيبىر ازاماتتار ناسيحاتتاۋدى قاجەت ەتپەيدى. الايدا، وزدەرىڭىزدەي جومارت جۇرەكتى ازاماتتاردى ەرەكشە اتاپ وتكىم كەلەدى. ءاردايىم حالىقتىڭ العىسىن ارقالاپ، ىستەرىڭىز بەرەكەلى بولا بەرسىن دەمەكپىن. ەلىمىزدىڭ وركەندەۋ جولىندا اتقارىلىپ جاتقان يگى قىزمەتتەرىڭىزگە تابىس، وتباسىلارىڭىزعا جاقسىلىق، دەندەرىڭىزگە ساۋلىق تىلەيمىن. تاۋەلسىزدىگىمىز تۇعىرلى، ەلدىگىمىز عۇمىرلى بولسىن!»، — دەدى ع.ءابدىرايىموۆ.

سونداي-اق، جيىن بارىسىندا قالالىق ارداگەرلەر كەڭەسىنىڭ باسشىسى ا.كەرىمبەكوۆ، قوعامدىق كەڭەستىڭ ءتوراعاسى ج.مەيرەمبايەۆ جانە ءماسليحات حاتشىسى ا.تەمىربولات يگى ءىستىڭ ۇيىتقىسى بولىپ جۇرگەن كاسىپكەرلەرگە ريزاشىلىقتارىن ايتىپ، ىستىق ىقىلاستارىن ءبىلدىردى.

ال، دەمەۋشىلەر اتىنان ءسوز العان «تالدىقورعان-كومفورت» جك ديرەكتورى، كاسىپكەر داۋرەن تاليپوۆ:

— ءبىزدىڭ قاۋىمداستىقتىڭ قۇرىلعانىنا التى اي بولدى. وسى ۋاقىت ارالىعىندا كوماندامىزعا سەكسەن جاس كاسىپكەر كەلدى. نەگىزگى ماقساتىمىز مۇقتاج جاندارعا كومەك كورسەتىپ، قايىرىمدىلىق شارالارىن ۇيىمداستىرۋ، ەكىنشىدەن جاس كاسىپكەرلەردىڭ دەڭگەيىن جوعارى دارەجەگە كوتەرۋ. سونىمەن قاتار قالامىزعا سىرتتان ينۆەستيسيا تارتۋ جوسپارىمىزدا بار، — دەپ اتاپ ءوتتى.

پاندەميا كەزىندە قولداۋ كورسەتكەن كاسىپورىنداردىڭ الدىڭعى قاتارىندا قۇرامىندا بىرنەشە وندىرىستىك جانە سەرۆيستىك كاسىپورىنداردى بىرىكتىرىپ وتىرعان «اسپمك-519» ج ش س، اككۋمۋلياتوردىڭ كوپتەگەن ءتۇرىن شىعارىپ، ەلىمىزگە جانە شەت مەملەكەتتەرگە تانىمال بولىپ وتىرعان «قاينار-اكب» ج ش س سىندى ءىرى ءوندىرىس وشاقتارى بار. ايتا كەتەيىك، تالدىقورعان قالاسىنىڭ اكىمدىگىندە كوروناۆيرۋس ينفەكسياسىنا قارسى كۇرەس ۇيىمداستىرۋ ءۇشىن ارنايى شتاب قۇرىلعان بولاتىن. ونىڭ قۇرامىندا كاسىپكەرلەر مەن دەنساۋلىق ساقتاۋ ارداگەرلەرى جانە قوعام قايراتكەرلەرى بار. شتاب قۇرىلعالى دەمەۋشىلەردىڭ قولداۋىمەن وسى ۋاقىتقا دەيىن 100-دەن اسا وتتەگى اپپاراتتارى اۋرۋحانالارعا تابىستالعان.

ايدار قالييەۆ