پرەزيدەنت قاسىم-جومارت توقايەۆ تۇركىستان وبلىسى ارىس قالاسىندا جارىلىس ورىن العان اسكەري پوليگونعا باردى دەپ حابارلادى پرەزيدەنتتىڭ باسپا ءسوز قىزمەتى. 

قاسىم-جومارت توقايەۆ بىلتىر جارىلىس بولعان ارىس قالاسىنداعى №44859 اسكەري بولىمىنە بارىپ، ونىڭ بۇگىنگى جاعدايىمەن تانىستى. قورعانىس ءمينيسترى نۇرلان ەرمەكبايەۆ وتكەن جىلعى جارىلىستان كەيىن قويماداعى وق-دارىلەردى كادەگە جاراتۋ جانە ولاردى تاسىمالداۋ جۇمىستارى جايىندا باياندادى. سونىمەن قاتار اسكەري ءبولىمنىڭ تەحنيكالىق ايماعىنداعى وق-دارىلەردىڭ قالدىعىن تازالاۋ، جارىلعىش زاتتاردى زالالسىزداندىرۋ، بۇزىلعان عيماراتتاردى قايتا قالپىنا كەلتىرۋ تۋرالى ايتتى. بۇدان بولەك قازاقستان پرەزيدەنتىنە اسكەري قۇرال-جابدىقتار مەن ارنايى تەحنيكالار تانىستىرىلدى.

قاسىم-جومارت كەمەل ۇلى  بۇل پوليگوننىڭ، اتالعان اسكەري ءبولىمنىڭ ۇلتتىق قاۋىپسىزدىكتى قامتاماسىز ەتۋدە ماڭىزدى ءرول اتقاراتىنىن اتاپ ءوتتى.

– قورعانىس ءمينيسترى جاڭا ماعان وق-دارىلەردىڭ ءقاۋىپسىز قويمالاردا ساقتالىپ جاتقانىن جانە ادامدارعا ءقاۋىپ تۋدىرمايتىنىن باياندادى. دەگەنمەن ءبىز ەندىگى جەردە مۇنداي جارىلىستىڭ بولۋىنا ەشقاشان جول بەرمەۋىمىز كەرەك. بۇل ماسەلە وتە ماڭىزدى جانە مەنىڭ تىكەلەي باقىلاۋىمدا بولادى، – دەدى پرەزيدەنت.

قاسىم-جومارت توقايەۆ وق-دارىلەردىڭ ءقاۋىپسىز ساقتالۋىن قامتاماسىز ەتۋ ماقساتىندا ۇكىمەتكە قازىرگى زامانعا ساي قويمالار سالۋ ءۇشىن قاجەتتى شارالار قابىلداۋدى تاپسىردى. ولاردىڭ ەلدى مەكەندەردەن الىس جەرلەردە سالىنۋىن، جارامسىز وق-دارىلەردى ۋاقتىلى جويۋ قاجەتتىگىن دە ەسكەرتتى.

– اسكەري-كولىك اۆياسياسىن، رادياسيالىق، حيميالىق جانە بيولوگيالىق قورعانىس كۇشتەرى مەن قۇرالدارىن، ينجەنەرلىك اسكەرلەردى، اسكەري مەديسينانى دامىتۋ قورعانىس مينيسترلىگى جۇمىسىنىڭ باسىم باعىتتارىنىڭ ءبىرى بولۋى ءتيىس، – دەدى قاسىم-جومارت كەمەل ۇلى.

بىلتىرعى جارىلىستان كەيىن ارىس قالاسى تولىقتاي قايتا جاڭاردى. اسكەري قىزمەتشىلەر 450 مىڭنان استام ءوق-دارى مەن جارىلعىش زاتتى زالالسىزداندىردى. قويماداعى وق-دارىلەردى كوشىرۋگە دايىندىقتىڭ نەگىزگى جۇمىستارى اياقتالدى.