قاراشا ايىندا وتەتىن امەريكانىڭ پرەزيدەنتتىك سايلاۋى قارساڭىندا ۆاشينگتون مەن پەكين اسكەري قاقتىعىسقا بارۋى مۇمكىن. بۇل تۋرالى اۆستراليانىڭ بۇرىنعى پرەمەر-مينيسترى مالىمدەدى.

پەكين مەن ۆاشينگتون اراسىنداعى قاتىناستار سوڭعى ايلاردا كوۆيد-19 پاندەمياسى، ساۋدا، گونكونگ جانە قىتايدىڭ شىڭجانداعى قازاق، ۇيعىر ازشىلىعىنا جاساعان قىسىمىنا بايلانىستى ناشارلادى. ەكى ەل اراسىنداعى ىقتيمال سوعىس ءقاۋپى تۋرالى ەسكەرتۋدى 2007-2010 جىلدار ارالىعىندا اۆستراليانىڭ پرەمەر-مينيسترى بولعان كيەۆين رادد جاسادى.

رادد مەلبۋرندەگى  لا تروب ۋنيۆەرسيتەتىندە "جۇڭگو ماسەلەسى: جاڭا قىرعي قاباق سوعىستىڭ الدىن الۋعا بولا ما؟" اتتى ءىس-شارادا ءسوز سويلەگەن.

ءىس-شارادا كوروناۆيرۋس جايىنداعى ءبىرقاتار پىكىرتالاستار بولعان.

رادد 3 قاراشادا امەريكادا سايلاۋ وتكىزىلەر الدىندا "قاتە ەسەپتەۋ جانە شيەلەنىسۋ جولىمەن قاقتىعىس" بولاتىنىن ەسكەرتكەن.

ونىڭ پىكىرىنشە، ەكى ەل اراسىنداعى ديپلوماتيالىق قاتىناستاردىڭ قۇلدىراۋى قاتەرلى سالدارعا اكەلۋى مۇمكىن. ول جۇڭگو مەن امەريكانىڭ سوعىس ۇشاقتارى مەن كەمەلەرىنىڭ بىر-بىرىنە وتە جاقىن كەلۋى جيىلەپ، قاقتىعىس بولۋىدىڭ از-اق الدىندا تۇرعانىنان الاڭدايتىنىن جەتكىزدى. ونىڭ سوزىنشە، جۇڭگو ءوز پوزيسياسىن نىعايتۋ ءۇشىن وڭتۇستىك جۇڭگو تەڭىزىندە تابيعي جانە جاساندى ارالداردا اسكەري بازالار، سونىڭ ىشىندە اەرودرومدار سالۋدا. ال، وعان ۆاشينگتون قاتاڭ تۇردە قارسى تۇرۋدا.

رادد مىرزانىڭ ايتۋىنشا، پەكيننىڭ دە، ۆاشينگتوننىڭ دا "ۇلتشىلدىق ەكپىندەرى" اشىق قاقتىعىستارعا اپارادى.

ول "اسىرەسە، ۆاشينگتوندا دا، بەيجىڭدە دە وتە كۇشتى ۇلتشىلدىق ساياساتى ءجۇرىپ جاتقادىقتان سايلاۋدان بىرنەشە اي بۇرىن " داعدارىس بولاتىنىن ەسكەرتكەن.