بۇگىن قازاقستان پرەزيدەنتى قاسىم-جومارت توقايەۆ پارلامەنتتىڭ 6-سەسسياسىندا قازاقستاندىقتارعا جاساعان جولداۋىندا ونەركاسىپكە قولداۋ كورسەتۋدى ايتتى.
– قازاقستاننىڭ الدىندا تۇرعان اسا ماڭىزدى مىندەت – ونەركاسىپتىك الەۋەتىمىزدى تولىق پايدالانۋ. وسى سالاداعى تابىستارىمىزعا قاراماستان، ىشكى نارىقتىڭ زور مۇمكىندىكتەرىن ءالى دە بولسا تولىققاندى جۇزەگە اسىرا الماي كەلەمىز. وڭدەلگەن تاۋارلاردىڭ ۇشتەن ەكىسىنە جۋىعى شەتەلدەن اكەلىنەدى. ۇلتتىق ەكونوميكانىڭ ستراتەگيالىق قۋاتىن ارتتىرۋ ءۇشىن تەز ارادا قايتا وڭدەۋ ءىسىنىڭ جاڭا سالالارىن دامىتۋ قاجەت. بۇل قارا جانە ءتۇستى مەتاللۋرگيا، مۇناي حيمياسى، كولىك قۇراستىرۋ جانە ماشينا جاساۋ، قۇرىلىس ماتەريالدارى مەن ازىق-تۇلىك ءوندىرۋ جانە باسقا دا سالالاردى قامتيدى. ساپالىق تۇرعىدان مۇلدە جاڭا ۇلتتىق يندۋستريانى دامىتۋ ءۇشىن جاڭعىرتىلعان زاڭنامالىق نەگىز قاجەت. ونەركاسىپتى رەتتەۋ جانە وعان قولداۋ كورسەتۋ ماسەلەلەرى ءتۇرلى زاڭنامالىق اكتىلەردە كورىنىس تاپقان. ءبىراق، ورتاق ماقسات كورسەتىلمەگەن، جۇزەگە اسىرىلاتىن ساياسات پەن شارالاردىڭ اراسىندا ءوزارا بايلانىس جوق، – دەدى پرەزيدەنت.
سونداي-اق، ول جەكەلەگەن سەكتورلاردى نەمەسە سالالاردى رەتتەيتىن كوپتەگەن زاڭ بارىن اتاپ ءوتتى.
– مىسالى، «ەلەكتر ەنەرگەتيكاسى تۋرالى» زاڭ، «كولىك تۋرالى» زاڭ. وڭدەۋ ونەركاسىبىن دامىتۋدىڭ قاعيداتتارىن، ماقساتتارى مەن مىندەتتەرىن بەلگىلەيتىن «ونەركاسىپ ساياساتى تۋرالى» ءبىرىزدى زاڭ جىل سوڭىنا دەيىن ازىرلەنۋگە ءتيىس. ونەركاسىپكە قولداۋ كورسەتۋدىڭ ناقتى شارالارىن دا جەتىلدىرۋ كەرەك. بىزدە جۇيەلى ءارى ءبىرتۇتاس ۇستانىم جوق. سونىڭ سالدارىنان سانسىز كوپ جوباعا قاراجاتتى ىسىراپ ەتىپ وتىرمىز، – دەيدى پرەزيدەنت.
پىكىر قالدىرۋ