پرەزيدەنت قاسىم-جومارت توقايەۆ پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جىل سايىنعى ءداستۇرلى جولداۋىندا جەردىڭ شەتەلدىكتەرگە ساتىلمايتىنىن اتاپ ءوتتى.
– كەلەسى جىلى اۋىل شارۋاشىلىعى ماقساتىنداعى جەرلەردى پايدالانۋ ماسەلەسى بويىنشا جەر كودەكسىنىڭ كەيبىر نورمالارىنا قاتىستى ەنگىزىلگەن موراتوريي كۇشىن جويادى. جەرىمىز شەتەلدىكتەرگە ساتىلمايدى. ءبىراق، ۇكىمەت اۋىل شارۋاشىلىعى جەرلەرىن تولىققاندى ەكونوميكالىق اينالىمعا ەنگىزۋدىڭ وزگە ادىس-تاسىلدەرىن ازىرلەۋگە ءتيىس. اگرارلىق سەكتورعا ينۆەستيسيا تارتۋ اۋاداي قاجەت. كاسىبي مامانداردىڭ تاپشىلىعى، سونداي-اق اگرارلىق عىلىمنىڭ ويداعىداي دامىماۋى – بۇل سالاداعى قوردالانعان ماسەلەلەر. وسى باعىتتا اتقارۋشى بيلىك تاراپىنان ناقتى شارالار قابىلدانۋى كەرەك، – دەيدى پرەزيدەنت توقايەۆ.
مەملەكەت باسشىسى تەحنولوگيالىق تۇرعىدان ەسكىرگەن سۋارۋ جۇيەسى ۇلكەن كەدەرگى كەلتىرىپ وتىرعانىن دا اتاپ ءوتتى.
– سۋدىڭ 40 پايىزى دالاعا كەتىپ جاتاتىن كەزدەرى بولادى. ونسىز دا سۋ تاپشىلىعىنىڭ زاردابىن تارتىپ وتىرعان ەلىمىز بۇعان جول بەرە المايدى. وسى سالانىڭ نورماتيۆتىك-قۇقىقتىق تۇرعىدان رەتتەلۋىن قامتاماسىز ەتىپ، زاماناۋي تەحنولوگيالار مەن يننوۆاسيانى ەنگىزۋ ءۇشىن ەكونوميكالىق ىنتالاندىرۋ شارالارىن ازىرلەۋ قاجەت، – دەيدى ول.
پىكىر قالدىرۋ