ۇكىمەت قازاقستان ازاماتتارىنىڭ زەينەتاقى جيناقتارىن مەرزىمىنەن بۇرىن الۋ جوسپارلارىن جاريالادى. "قامشى" ءتىلشىسى جاڭا ەنگىزىلگەن وزگەرىستەرگە شولۋ جاساپ شىقتى.

زەينەتاقى جيناعىنىڭ ءبىر بولىگىن كىمدەر الا الادى؟

ەڭبەك ءمينيسترى ءبىرجان نۇرىمبەتوۆ ءبىرىنشى كەزەكتە جۇمىس ىستەگەن، جۇمىس ىستەپ جۇرگەن ازاماتتار، ياعني ءبىرىڭعاي زەينەتاقى قورىندا جارنالارى بار ازاماتتاردىڭ جينالعان سوماسى جەتكىلىكتى شەگىنەن اسىپ جاتسا الا الادى. مۇنداي ازاماتتار قاتارى 530 مىڭدى قۇرايدى.

ەكىنشى، زەينەت جاسىنا جەتكەن ادامدار ولاردىڭ جيناقتاۋشى قورىندا قاراجاتى بار بولسا، ول كىسىلەر 50 پايىزعا دەيىن الا الادى. مۇنداي كىسىلەردىڭ سانى – 178 مىڭنان اسادى. ونىڭ ىشىندە قۇقىق قورعاۋ ورگاندارىنىڭ زەينەتكەرلەرىنە دە تاراتىلىپ بەرىلەدى.

ءۇشىنشى، زەينەتاقىلىق اننۋيتەتتى راسىمدەگەن ازاماتتار، ياعني جيناقتاۋشى قورىنان ساقتاندىرۋ قورىنا اۋدارعاننان كەيىن قوردا قاراجاتتارى قالعان بولسا، ولاردى تولىعىمەن الۋعا بولادى. مۇنداي ازاماتتار سانى – 13 300.

زەينەتاقى جيناقتارىنىڭ "جەتكىلىكتى شەگى" قانداي؟

زەينەتاقى جيناقتارىنىڭ جەتكىلىكتى شەگى – زەينەتاقى جيناعىنداعى ەڭ از قاجەتتى سوما. ول ءار ادامنىڭ جاسىنا سايكەس بەلگىلەنەدى. سونداي-اق، بۇل جولى ەرلەر مەن ايەلدەر ءۇشىن جاس شاماسى بىردەي بولادى. 

اتالعان قارجىلارى بار ازاماتتاردىڭ قاجەتتى اقشانى الۋعا قۇقىعى بار.

ۋاقىتىنان بۇرىن الىنعان زەينەتاقى جيناقتارىن قايدا جۇمساۋعا بولادى؟

1) باسپانا ساتىپ الۋعا؛

2) قاجەتتى ەم-دومعا؛

3) قارجى كومپانيالارعا باسقارۋ ءۇشىن اۋدارۋعا؛

مينيستر نۇرىمبەتوۆتىڭ ايتۋىنشا، قاراجاتتى تۇرعىن ءۇي نەمەسە جەر ۋچاسكەسىن ساتىپ الۋعا جۇمساۋعا بولادى. سونداي-اق باستاپقى، جاڭا ءۇي ەمەس، قايتالاما نارىقتاعى "ەكىنشى رەتتىك" ءۇيدى دە ساتىپ الۋعا مۇمكىندىگى بار. 

ايتا كەتەيىك، بۇل قارجى ارقىلى يپوتەكا قارىزىن دا وتەۋگە بولادى.

جيناعىنىڭ ءبىر بولىگىنەن ساتىپ الىنعان ءۇيدى تەك 5 جىلدان كەيىن عانا ساتۋعا مۇمكىندىگى بولۋى مۇمكىن.

جيناقتىڭ ءبىر بولىگىن ەم-دومعا قالاي جۇمسايدى؟

ەمدەلۋگە اقى تولەۋ ءۇشىن دەنساۋلىق ساقتاۋ باسقارمالارى (وبلىستار، رەسپۋبليكالىق ماڭىزى بار قالالار) جانىنان ارنايى قۇرىلعان كوميسسيالارعا جۇگىنەدى. كوميسسيا قورىتىندىسى شىققاننان كەيىن، كلينيكا تاڭدالىپ، زەينەتاقى جيناقتارىن ماقساتتى پايدالانۋ جونىندەگى ۋاكىلەتتى وپەراتورعا ءوتىشىن جىبەرەدى.

جيناقتارىنىڭ ءبىر بولىگىن ءوزىڭىزدىڭ، جۇبايىڭىزدىڭ نەمەسە جاقىن تۋىستاردىڭ ەم-دومىنىڭ قاراجاتىن وتەۋ ءۇشىن دە پايدالانۋعا بولادى.

مەديسينا كومەگىن زەينەتاقى جيناعىنان تولەۋ ەرەجەسىن دەنساۋلىق ساقتاۋ مينيسترلىگى بەلگىلەيدى.

سەنىمگەرلىك باسقارۋعا بەرۋ قالاي جۇزەگە اسادى؟

قازاقستاندىقتار زەينەتاقىنىڭ ءبىر بولىگىن قارجى كومپانياسىنىڭ باسقارۋىنا بەرۋ ءۇشىن پايدالانا الادى. سالىمشى جەكە قارجى كومپانياسىن تاڭداۋدى ءبىرىڭعاي جيناقتاۋشى زەينەتاقى قورىنا  ءوتىنىش بەرۋ ارقىلى جۇزەگە اسىرادى.

نەگىزگى قاعيدالارىن قارجى نارىعىن رەتتەۋ جانە دامىتۋ اگەنتتىگى ايقىندايتىن بولادى.

ازاماتتار جيناقتىڭ ءبىر بولىگىن كىمدەرگە پايدالانا الادى؟

جيناعىنىڭ ءبىر بولىگىنىڭ شەشىپ الاتىندار قارجىنى تەك وزىنە عانا ەمەس، جۇبايى مەن جاقىن تۋىستارى ءۇشىن دە پايدالانا الادى. زاڭ بويىنشا، جاقىن تۋىستارىنا اتا-اجەسى، اتا-اناسى، بالالارى، نەمەرەلەرى، باۋىرلارى، ياعني اپكە-سىڭلىسى، قارىنداسى، ءاعا-ىنىسى جاتادى. 

ايتا كەتەيىك، زەينەتاقى جيناعىنىڭ ءبىر بولىگىن پايدالانۋعا 2021 جىلدان باستاپ رۇقسات ەتىلەدى.