اقش پرەزيدەنتى دونالد ترامپ رەسەي گيپەردىبىستى قارۋدى باراك وبامانىڭ اكىمشىلىگىنەن ۇرلاپ الىپ، جاساپ شىققان دەپ مالىمدەمە جاسادى. پرەزيدەنت وسىلايشا قۇپيا اقپاراتتى اشتى دەگەن ايىپتاۋلارعا جاۋاپ بەردى، دەپ حابارلادى ريا نوۆوستي.
– تۇككە تۇرعىسىز بىرەۋ: "ول قۇپيا اقپاراتتى جاريالاپ جاتقان سەكىلدى" دەپ جاتىر. جوق. مەن الەمگە بىزدە ەڭ كۇشتى قارۋ بار ەكەنىن ايتتىم، ءبىراق مەن بۇل قانداي قارۋ ەكەنىن ايتپايمىن. ءبىز ونى ەشقاشان قولدانبايمىز دەپ ۇمىتتەنەمىن. بىزدە سۋپەر-پۋپەر-گيپەرسونيالىق زىمىران بار، ول قاراپايىم زىمىرانعا قاراعاندا بەس ەسە جىلدام. ال رەسەي بۇل اقپاراتتى وباما اكىمشىلىگىنەن ۇرلاپ، وزدەرى جاساپ العان، – دەدى ترامپ سايلاۋالدى ميتينگىتە سويلەگەن سوزىندە.
ترامپ تاعى دا اقش-تىڭ الەمدەگى ەڭ قۋاتتى قارۋى بار ەكەنىن قايتالاپ ايتتى.
– بىزدە ءقازىر ادام قولىنان جاسالعان ەڭ ۇلكەن قارۋ بار. ءبىز اسكەردى جانداندىرىپ، ونى ەشكىم مۇمكىن ەمەس دەپ ويلاعان دەڭگەيگە كوتەردىك. مەن ادامزاتقا بەلگىلى ەڭ كۇشتى قارۋدى جاسادىق دەپ ايتتىم. بۇل راس، – دەدى ول.
پرەزيدەنتتىڭ ايتۋىنشا، بۇل قارۋ وزىق تەحنولوگيا قاتارىندا، سوندىقتان رەسەي مەن جۇڭگو اقش-تى "قىزعانادى".
– ولار بىزدە نە بار ەكەنىن بىلمەيدى، ءبىراق ەشكىم ەشقاشان ەستىمەگەن ءبىر دۇنيە ەكەنىن سەزىپ، ءبىلىپ وتىر، – دەپ قورىتىندىلادى ترامپ.
