«Nur Otan» پارتياسىنىڭ ورتالىق اپپاراتى نۇر-سۇلتان قالاسىندا جاڭا مۇشەلەردى قابىلداۋ كەزىندە بولعان ولقىلىقتاردى انىقتادى. بۇل تۋرالى پارتيالىق باقىلاۋ كوميتەتىنىڭ وتىرىسى بارىسىندا بەلگىلى بولدى. 

ەلباسى، پارتيا ليدەرى نۇرسۇلتان نازاربايەۆتىڭ پارتياىشىلىك سايلاۋدا اشىق، انىق جانە ءادىل داۋىس بەرۋدى قامتاماسىز ەتۋ قاجەتتىگى تۋرالى تاپسىرماسىن ورىنداۋ اياسىندا «Nur Otan» ورتالىق اپپاراتى پارتيانىڭ جاڭادان قابىلدانعان مۇشەلەرى مەن «پرايمەريز» اقپاراتتىق جۇيەسىندە تىركەۋدەن وتكەندەرگە تالداۋ جۇرگىزەدى.

وسىلايشا، كەزەكتى تەكسەرۋ بارىسىندا ەلوردادا «ازيا ورتالىق سناب» ج ش س باستاۋىش پارتيا ۇيىمى قابىلداعان 2466 جاڭا پارتيا مۇشەسىنىڭ ەسەپتىك مالىمەتتەرى راستالمادى. وسى ورايدا، 11 قىركۇيەكتەن 4 قازانعا دەيىن پارتياعا قابىلداۋدىڭ توقتاتىلۋىنا قاراماستان، 12-17 قىركۇيەك ارالىعىندا مۇنىڭ ارى قاراي دا جۇزەگە اسىرىلعانى انىقتالدى.

– بۇل ورەسكەل ءتارتىپ بۇزۋشىلىقتار. بىزگە پارتيادا جەكە «قاجەتتى» كانديداتتار ءۇشىن داۋىس بەرۋدى ۇيىمداستىرۋعا ارنالعان وزدەرىنىڭ ءبىر ساتتىك ماسەلەلەرىن شەشەتىندەر، ءجاي عانا قارا كوبەيتەتىندەر قاجەت ەمەس. سوندىقتان داۋىس بەرۋ كەزىندە ىقتيمال بۇرمالاۋلاردى بولدىرماۋ ءۇشىن پرايمەريز كەزەڭىندە پارتياعا قابىلداۋ توقتاتىلدى. وسى فاكتىلەردى ەسكەرە وتىرىپ، پارتيانىڭ استانالىق فيليالى «ازيا سەنتر سناب» ج ش س بپۇ-داعى بارلىق پارتيا مۇشەلەرىنىڭ دەرەكتەرىن سالىستىرىپ، تەكسەرۋى ءتيىس، – دەپ مالىمدەدى پارتيالىق باقىلاۋ كوميتەتىنىڭ ءتوراعاسى پاۆەل كازانسيەۆ.

باسپا ءسوز قىزمەتىنىڭ مالىمەتىنشە، پارتيالىق باقىلاۋ كوميتەتىنىڭ تەكسەرۋى بارىسىندا پارتيا مۇشەلەرىن ءبىر تەلەفون نومىرىمەن تىركەۋ دەرەكتەرى انىقتالدى.

مىسالى، اقمولا وبلىسىنىڭ بۋراباي اۋدانىندا «ءبىلىم بۋراباي» جانە «بىرلىك بۋراباي» بپۇ-دا پارتيانىڭ 105 مۇشەسىنىڭ ءبىر تەلەفون ءنومىرى بار. ال قاراعاندى وبلىسىنىڭ بالقاش قالاسىندا «ارداگەر»، «گۇلدەر»، «بالقاش ستانسياسى» جانە «شيپاگەر» بپۇ-دا ءبىر تەلەفون ءنومىرىنىڭ يەلەرى 279 ادام بولدى.

وتىرىس قورىتىندىسى بويىنشا ايماقتىق جانە اۋماقتىق پارتيالىق باقىلاۋ كوميسسيالارىنا بارلىق ايقىندالعان فاكتىلەردى انىقتاپ، كىنالىلەردى جازالاۋ تاپسىرىلدى.

ەسكە سالا كەتەيىك، بۇعان دەيىن پارتيا ءتوراعاسىنىڭ ءبىرىنشى ورىنباسارى باۋىرجان بايبەك پرايمەريزدە ونلاين-داۋىس بەرۋدىڭ اشىقتىعىن قامتاماسىز ەتۋ ءۇشىن ارنايى راستاۋ (ۆەريفيكاسيا) جۇيەسى (ينتەرنەت-بانكينگ ۇلگىسى بويىنشا جەكە تۇلعانى انىقتاۋ) قولدانىلاتىنىن ايتقان بولاتىن.

جۇيە قاعيداتى: «ءبىر داۋىس، ءبىر جسن، ءبىر ءموبيلدى ءنومىر جانە ءبىر IP-مەكەنجاي». ياعني، ەشكىم ەكى رەت كىرە المايدى جانە تيىسىنشە، باسقا ادامعا داۋىس بەرە المايدى. مۇنىڭ ءبارى ءار ءتۇرلى بۇرمالاۋشىلىقتاردى، ايلا-شارعىنى، سونداي-اق، جاپپاي داۋىس بەرۋگە ماجبۇرلەۋدى بولدىرماۋ ءۇشىن ىستەلىپ وتىر.

پارتيانىڭ باسپا ءسوز قىزمەتى بارلىق ءتارتىپ بۇزۋشىلىق دەرەكتەرى بويىنشا 8 (800) 080 4441 «جەدەل جەلىگە» (قوڭىراۋ شالۋ تەگىن) نەمەسە  komek@nurotan.kz ەلەكتروندىق پوشتاعا  حابارلاسۋعا بولاتىنىن اتاپ ءوتتى.