25 قىركۇيەك، كەشە ۋكراينانىڭ حاركوۆ وبلىسىندا ۋكراين قارۋلى كۇشتەرىنىڭ ان-26 اسكەري ۇشاعى اپاتقا ۇشىرادى. بۇل تۋرالى korrespondent.net حابارلادى. 

ۇشاق اسكەري دايىندىق ءبولىمىنىڭ اەرودرومى ورنالاسقان چۋگۋيەۆ قالاسىنىڭ ماڭىنا قونعان كەزدە قۇلاعان. بورتتا ەكيپاجدان باسقا، ۋكراينانىڭ حاركوۆ ااك كۋرسانتتارى بولعان.

سوڭعى مالىمەتتەر بويىنشا، ۇشاق اپاتى سالدارىنان 25 ادام قايتىس بولعان.

– وسى مينۋتقا دەيىن 25 ادام قايتىس بولدى، اۋىر جارالانعان 2 ادام مەديسينالىق مەكەمەلەرگە جەتكىزىلدى، قالعاندارىن ىزدەۋ جالعاسۋدا، –  دەپ حابارلادى ۋكراينا باس پروكۋراتۋراسىنىڭ باسپا ءسوز قىزمەتى.

وقيعاعا بايلانىستى "اپاتتار مەن اۋىر زارداپتارعا اكەپ سوققان ۇشۋ ەرەجەلەرىن بۇزۋ جانە ولارعا دايىندىق تۋرالى" بابى بويىنشا قىلمىستىق ءىس قوزعالدى.

ۋكراينا پرەزيدەنتى ۆلاديمير زەلەنسكيي قايعىلى وقيعا ورنىنا باراتىندىعىن ايتتى.

– ءبىز شۇعىل تۇردە بارلىق قايعىلى جاعداي مەن سەبەپتەردى تەرگەۋ جونىندەگى كوميسسيا قۇرىپ جاتىرمىز. مەن ءتيىستى تاپسىرمالاردى پرەمەر-مينيسترگە بەردىم. ىزدەستىرۋ توبى ءقازىردىڭ وزىندە جۇمىس ىستەپ جاتىر. ەرتەڭ مەن حاركوۆ وبلىسىندا بولامىن، – دەپ جازدى زەلەنسكيي ءوزىنىڭ Telegram-كانالىندا.