1 قازاندا «Nur Otan» پارتياسى ۇيىمداستىرىپ وتىرعان پرايمەريزگە داۋىس بەرۋ باستالدى.

وسى ورايدا تانىمال ساياساتكەر، قوعام جانە مەملەكەت قايراتكەرى، ۇزاق جىل بيىك لاۋازىمداردى اتقارعان ەرمۇحامەت ەرتىسبايەۆ «Azattyq Rýhy» اقپاراتتىق اگەنتتىگىنە بەرگەن سۇحباتىندا پرايمەريز تۋرالى پىكىرىن ءبىلدىرىپ، ءماجىلىس سايلاۋىنا دايىندىقتىڭ ەگجەي-تەگجەيىنە توقتالدى.

ونىڭ ايتۋىنشا، كوشباسشى پارتيانىڭ پرايمەريزىنە قوعام تاراپىنان سەرپىلىس زور ەكەنىن جانە داۋىس بەرۋ كەزىندە سايلاۋشىنى نە قىزىقتىرا الاتىنىن اتادى.

– ارينە، سايلاۋشىلار سايلاۋالدى باعدارلامانىڭ مازمۇنىنا ەرەكشە كوڭىل بولەتىن بولادى. كانديداتتىڭ حالىق الدىندا ءوزىن قالاي ۇستاپ، قالاي سويلەيتىنىنە دە كوپ نارسە بايلانىستى. وسى ورايدا مەن كوپتەگەن قاتىسۋشىلاردىڭ دەباتتان باس تارتقانىنا تاڭعالدىم. جۋىردا 700-800 ادام پرايمەريزدەن شەتتەتىلدى. بۇلاي بولمايدى عوي. ساياساتقا قۇلاش ۇرا وتىرىپ، دەباتتان، اشىق پىكىرتالاستان قالايشا باس تارتۋعا بولادى. بۇل ءوزىڭدى وزگەگە تىڭداتۋدىڭ جالعىز مۇمكىندىگى ەمەس پە؟! سوندىقتان پارتيا باسشىلىعىنىڭ بۇل ادامداردى پرايمەريزگە قاتىسۋدان شەتتەتۋ تۋرالى شەشىمى دۇرىس. وتكەن جىلعى قىركۇيەكتە مەن ۇزاق جىلعى ديپلوماتيالىق ءىس-ساپاردان كەيىن قازاقستانعا ورالدىم. اشىق ايتايىن، كوڭىلىمدە ءبىراز كۇدىك بولدى. ءبىراق بۇگىندە كوڭىلىم مارقايا وتىرىپ، اتاپ وتكىم كەلەدى: سايلاۋعا دەيىن 3 اي قالعاندا «Nur Otan» ايقىن فاۆوريتكە اينالدى. ويتكەنى وزگە ساياسي پارتيالار پرايمەريز ۇيىمداستىرماق تۇگىل، ۇيىمداستىرۋشىلىق-ساياسي تۇرعىدا كادرلىق جاڭعىرتۋدى دا وتكىزىپ جاتقان جوق! – دەدى ەرمۇحامەت ەرتىسبايەۆ.

ەستەرىڭىزگە سالا كەتەيىك، 1 قازاندا ساعات 00:00-دەن باستاپ، 3 قازان ساعات 14:00-گە دەيىن پرايمەريزگە ءموبيلدى قوسىمشا جانە ارنايى ۆەب-پورتال ارقىلى داۋىس بەرۋ وتەدى. داۋىس بەرۋدىڭ سوڭعى كۇنى (3 قازان) ينتەرنەت جوق ەلدى مەكەندەردە قاعاز بيۋللەتەندەر بويىنشا داۋىس بەرۋگە بولادى.

تانىمال قوعام قايراتكەرىنىڭ سۇحباتىنىڭ تولىق نۇسقاسىن https://www.youtube.com/watch؟v=i2-DE1KOPOU  سىلتەمەسىنەن كورە الاسىز.