دەنساۋلىق ساقتاۋ ءمينيسترى الەكسەي سوي ەنگىزىلگەن كارانتيندىك شارالاردىڭ ناتيجەلەرى بويىنشا قانداي قاتەلىكتەردى ەسكەرۋ قاجەتتىگىن ايتتى.
– كارانتيندە وتكىزگەن ۋاقىتتان قورىتىندى شىعارىپ، ساباق الۋىمىز قاجەت. ءبىز دەنساۋلىق ساقتاۋ سالاسىن دايىنداپ قويدىق. اۋرۋحاناداعى توسەك ورىنداردان باستاپ جاساندى تىنىس الدىرۋ اپپاراتتارىنا دەيىن. ءبىز ءارقاشان نازار اۋداراتىن ماڭىزدى ماسەلە: ساقتىق شارالارىن ساقتاۋ جانە الەۋمەتتىك اراقاشىقتىقتىڭ ەسكەرىلۋى. دەگەنمەن دە، بۇل ماسەلەلەرگە كەپىلدىك بەرۋ قيىن، – دەدى ول ورتالىق كوممۋنيكاسيالار قىزمەتىندەگى بريفينگتە.
سونداي-اق مينيستر ازاماتتاردىڭ قوعامدىق ورىنداردا رەجيمدى ءجيى ساقتاي بەرمەيتىنىن اتاپ ءوتتى.
– قۇقىق قورعاۋ ورگاندارى ءبىزدىڭ اۋماقتىق دەپارتامەنتتەرمەن بىرلەسىپ جۇمىستار جۇرگىزۋدە. وكىنىشكە وراي، ايىپپۇلدار وتە كوپ. ولار ايدان ايعا وسۋدە. بۇل ءبىزدىڭ ەلدە رەجيمنىڭ ساقتالماعانىن كورسەتەدى. ازىرگە ءبىزدىڭ جاعدايىمىز تۇراقتى. ەگەر ساقتىق شارالارىن ساقتاساق، كارانتين ەنگىزبەۋگە بولادى. بۇل ءبىزدىڭ قولىمىزدا. ال ءتارتىپ بۇزۋشىلىقتار تىيىلماسا، كارانتين ەنگىزۋ تۋرالى كەڭەس بەرۋگە تۋرا كەلەدى، – دەپ ەسكەرتتى الەكسەي سوي.
پىكىر قالدىرۋ