ەركەبۇلان دايىروۆ،  م.اۋەزوۆ اتىنداعى قازاقتىڭ مەملەكەتتىك اكادەميالىق دراما تەاترىنىڭ اكتەرى، «سەرپەر» جاستار سىيلىعىنىڭ لاۋرەاتى:

قازاقتا: «بۇلاق كورسەڭ كوزىڭ اش»-دەگەن ادەمى ءسوز بار. جاستاردى قولداپ «سەرپەر» سىيلىعىمەن ماراپاتتاپ جاتقانى ءبىز ءۇشىن ۇلكەن قۋانىش.

الماس شاياحمەتوۆ، م.اۋەزوۆ اتىنداعى قازاقتىڭ مەملەكەتتىك اكادەميالىق دراما تەاترىنىڭ اكتەرى، «سەرپەر» جاستار سىيلىعىنىڭ لاۋرەاتى:

 - قارا شاڭىراق تەاترعا كەلگەلى التى جىلدىڭ ءجۇزى بولىپتى. سول جىلداردا ەتكەن ەڭبەگىمىز باعالانىپ «سەرپەر» جاستار سىيلىعىنىڭ لاۋرەاتى اتانىپ وتىرمىز. بۇل ءبىز ءۇشىن ۇلكەن قۋانىش.

ەسمۇحان وبايەۆ، قازاقستاننىڭ حالىق ءارتيسى:

- جاس اكتەرلەردىڭ پروفەسسيونالدى تەاترعا كەلگەننەن كەيىن، ولاردىڭ شىعارماشىلىعىنىڭ باعالانعانى، حالىققا جەتكەنى، حالىقتىڭ مويىنداعانى ول ارتيست ءۇشىن باقىتتىڭ ۇلكەنى بولۋ كەرەك. ونىڭ ىشىندە ۇستازى مەن ءۇشىن بۇل ۇلكەن قۋانىش. قاراپ وتىرسام وسى م.اۋەزوۆ تەاترىندا  جەتپىستەن اسا اكتەر بولسا، سولاردىڭ كوبىسىنىن ۇستازى ەكەنمىن. ءومىرىمنىڭ جيىرما بەس جىلىن اكتەر تاربيەلەۋمەن وتكىزىپ كەلە جاتقان اداممىن. قازاقستاننىڭ قاي تەاترىندا بولماسىن شاكىرتتەرىم قىزمەت ەتىپ جاتىر. باسىم كوپشىلىگى الماتىدا، ونىڭ ىشىندە كوپشىلىگى م.اۋەزوۆ تەاترىندا.

ەركەبۇلان دايىروۆ پەن الماس شاياحمەتوۆ «سەرپەر» سىيلىعىنىڭ لاۋرەاتى اتانىپ وتىر. بۇل جاس اكتەردىڭ ەڭبەگىنىڭ باعالانعانى. ەكەۋى دە ءبىرىنشى كۋرستان باستاپ، سول كۋرستىڭ ىشىندە ليدەرى بولدى.  مەنىڭ ءبىر ءسوزىم بار «جاقسى ادامنان عانا جاقسى ارتيست شىعادى» دەگەن. سوندىقتان ەكەۋى دە جاقسى ادام، جۇمىس ىستەۋ ءتاسىلى دە وزگە ارتيستەرگە قاراعاندا باسقاشا.  ولاردىڭ ەرەكشەلىگى اۋىلدا وسكەن، قازاقتىڭ ءتىلىن، ادەبيەتىن، تاريحىن جاقسى بىلەدى. سونىمەن قاتار تاربيەسى اتا كورگەن، انا كورگەن، ۇلكەندى سىيلايتىن، قازاقشىلىعى مول، يناباتتى جىگىتتەر.

ەكەۋىندە قارا شاڭىراق تەاتردىڭ باس گەرويلارى دەپ ايتۋعا بولادى. مىسال ءۇشىن ەركەبۇلان دايىروۆ ارتيستەر ارمانداپ جۇرەتىن  م.اۋەزوۆتىڭ «ەڭلىك-كەبەگىندەگى» كەبەك، «ابايىنداعى» ايدار،  د.يسابەكوۆتىڭ «جاۋجۇرەگىندەگى» بالۋان شولاق، ن.گوگولدىڭ «ۇيلەنۋىندەگى» پودكولەسين، ۋ.شەكسپيردىڭ «رومەو مەن دجۋلەتتاسىنداعى» مەركۋسيو، ر.وتاربايەۆتىڭ  «بەيبارىس سۇلتانىنداعى» قالاۋىن  رولدەرىن  ويناسا،  الماس شاياحمەتوۆ م.اۋەزوۆتىڭ «ابايىنداعى» ايدار،  ن.ءورازاليننىڭ «شىراق جانعان تۇنىندە» تاڭات، د.يسابەكوۆتىڭ «جاۋجۇرەگىندەگى» سۇتەمگەن، ر.وتاربايەۆتىڭ  «بەيبارىس سۇلتانىنداعى» قۇتىز، ۋ.شەكسپيردىڭ «گاملەتىندە» لاەرت وبرازدارىن بەينەلەدى.

 ەكى اكتەردى دە سەگىز قىرلى، ءبىر سىرلى ارتيست دەپ ايتۋعا بولادى. ەكەۋىنىڭ ءتىلى، فاكتۋراسى، بويىنىڭ بيىكتىگى، سىمباتى، ساحنالىق بولمىسى تارتىمدى. جاستاردىڭ ىشىندە سۋىرىلىپ العا شىققاننان كەيىن ەكەۋىنە قويىلاتىن تالاپتا كوپ. تەاتردان بولەك كينو ونەرىندە دە ۇلكەن رولدەرگە بارىپ جۇرگەن اكتەرلەر. مىسالى ءۇشىن ەركەبۇلان دايىروۆ جيىرما جەتى جاسىندا حالىق قاھارمانى باۋىرجاننىڭ بەينەسىن جاسادى. اكتەر ءۇشىن بۇل ۇلكەن جەتىستىك. بۇگىنگى جەتكەن جەتىستىكتەرىمەن شىن پەيىلىممەن قۇتتىقتايمىن. بۇل مەنىڭ اكەلىك، ۇستازدىق تىلەگىم! ەگەمەندىك ەلىمىزدىڭ ەڭ ءبىر جاقسى سىيلىعى بۇل «سەرپەر» جاستار سىيلىعى.

ەرلان ءبىلال،م.اۋەزوۆ اتىنداعى قازاقتىڭ مەملەكەتتىك اكادەميالىق دراما تەاترىنىڭ اكتەرى، ق ر ەڭبەك سىڭىرگەن قايراتكەرى:

- ەركەبۇلان مەن الماس تەاترىمىزدىڭ جاس اكتەرلەرى. تەاترعا جۇمىسقا قابىلدانعان ساتتەن ۇلكەن-ۇلكەن سۇبەلى جاقسى رولدەرگە يە بولدى. اتاپ ايتساق: م.اۋەزوۆتىڭ «ابايىنداعى» ايدار، «ەڭلىك-كەبەكتەگى» كەبەك سىندى رولدەر. وزدەرىنە جۇكتەلگەن جاۋاپكەرشىلىكتى كاسىبي تۇرعىدان ۇلكەن دەڭگەيدە الىپ شىعىپ، تەاترىمىزدا ۇجىمنىڭ الدىندا وزدەرىنىڭ بەت-بەدەرلەرىن جوعالتپاي، جۇكتەلگەن جاۋاپكەرشىلىكتى جوعارعى دەڭگەيدە الىپ شىققان اكتەرلەرىمىز.

الما كاكىشيەۆا، م.اۋەزوۆ اتىنداعى قازاقتىڭ مەملەكەتتىك اكادەميالىق دراما تەاترىنىڭ رەجيسسەرى:

-  ەركەبۇلان دايىروۆ پەن الماس شاياحمەتوۆتىڭ «سەرپەر» جاستار سىيلىعىنىڭ لاۋرەاتى اتانىپ جاتقانى ۇلكەن قۋانىش. تەاترعا كەلگەن بەس-التى جىلدىڭ ىشىندە وزدەرىنىڭ جان-جاقتى دارىندى ارتيست ەكەندەرىن كورسەتتى. ەركەبۇلاننىڭ م.اۋەزوۆتىڭ «ابايىنداعى»  ايدارى. ر.وتاربايەۆتىڭ «بەيبارىس سۇلتانىنداعى» قالاۋىن بەينەلەرى جاقسى شىققان رولدەرى ەكەنىڭ اتاپ وتكەن ءجون.  ايدار ءرولىن الماس ەكەۋى ەكى قۇرامدا  وينايدى. ەكەۋىنىڭ دە وزىندىك ينتەرپرەتاسياسى بار.  بيىلعى جىل ەركەبۇلانعا تابىستى جىل بولدى. تانىمال كينو رەجيسسەرى ا.ساتايەۆتىڭ «ۆولوكالامسك تاس جولى» فيلمىندە قازاقتىڭ باتىرى باۋىرجان مومىش ۇلىنىڭ ءرولىن سومدادى. اتالمىش فيلم  ءوزىنىڭ دەڭگەيىندە شىعا جاتار، ءبىراق سوعان باتىلى بارىپ ويناپ شىققانىنىڭ ءوزى ەرلىك دەپ ويلايمىن

ەكى اكتەرىمىز ءبىزدىڭ تەاتردىڭ بولاشاعى. بولاشاقتا ۇلكەن رولدەرگە باراتىن، تەاترىمىزدىڭ ءبىر قازىعىن ۇستايتىن جىگىتتەر دەپ ويلايمىن. جالپى تەاتردى ءسۇيۋ كەرەك.  تەاترعا قالتىقسىز ەڭبەك ەتسە، ول ەڭبەك جانادى.  تەاتردا باعى جانعان اكتەر، ول ءوزىنىڭ ميسسياسىن ورىنداعان اكتەر دەۋگە بولادى.  بولاشاقتا ءانۋار مولدابەكوۆتىڭ، ءاسانالى ءاشىموۆتىڭ ءىزىن جالعاستىراتىن اكتەرلەر  بولادى دەپ سەنەمىن.

جالعاس تولعانباي، م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ اكتەرى:

- ەركەبۇلان دايىروۆ  مەن الماس شاياحمەتوۆ  ۇلاعاتتى ۇستاز، قازاقستاننىڭ حالىق ءارتيسى ەسمۇحان وبايەۆتىڭ مەكتەبىن كورگەن تالانتتى جاستار. ەكەۋى دە اكادەميا قابىرعاسىندا وقىپ ءجۇرىپ، قارا شاڭىراق م.اۋەزوۆ اتىنداعى قازاقتىڭ مەملەكەتتىك اكادەميالىق دراما تەاترىنىڭ اكتەرلىك قۇرامىنا قابىلداندى. سودان بەرگى ۋاقىت ىشىندە كوپتەگەن باستى، قوسالقى رولدەردە ويناپ وزدەرىنىڭ ماماندىعىنىڭ  شەبەرى ەكەنىن كورسەتتى.

باۋىرجان مانجىگىتوۆ، م.اۋەزوۆ اتىنداعى قازاقتىڭ مەملەكەتتىك اكادەميالىق دراما تەاترىنىڭ اكتەرى:

-  ەركەبۇلان دايىروۆ، الماس شاياحمەتوۆ ءبارىمىز ت.جۇرگەنوۆ اتىنداعى قازاق ۇلتتىق ونەر اكادەمياسىن تەتەلەس بىتىرگەن اكتەرلەرمىز. قارا شاڭىراق تەاترعا دا ءبىر جىلى قابىلداندىق دەۋگە بولادى. جاس بولسا دا ەكەۋىنىڭ تابيعي دارىنى بار. تەاتر سالاسىندا عانا ەمەس، كينو ونەرىندە دە وزىندىك قولتاڭبالارىن قالىپتاستىرىپ جۇرگەن ارتيستەر. كوپ وقىپ، كوپ ىزدەنەدى.

   بەلگىلى تەاتر رەفورماتورى ك.ستانيسلاۆسكيي «كىشكەنتاي رول بولمايدى، كىشكەنتاي اكتەر بولادى»- دەپ ايتقان. ولار ءرولدىڭ ۇلكەن، كىشىلىگىنە قاراماي، بار ىنتاسىمەن، جۇرەگىمەن  وينايدى. بۇگىنگى جەتىستىك سونىڭ ناتيجەسى دەپ ويلايمىن.

ماتەريالدى دايىنداعان سالتانات ابىلعازييەۆا